Siç raportoi TV21, SHA MEPSO zyrtarisht ka anuluar marrëveshjen me “Energoinvest” nga Sarajeva për ndërtimin e largpërçuesit me Shqipërinë, transmeton TV21. Nga MEPSO në një komunikatë lëshuar mediave theksojnë se marrëveshja është anuluar për shkak të mospërmbushjes së detyrimeve nga ana e kompanisë.
Kumtesa e plotë nga SHA MEPSO.
“ShA MEPSO ndërpren kontratën me kontraktuesin e projektit interkonektorit 400 kV ndërmjet Maqedonisë së Veriut dhe Shqipërisë.
ShA MEPSO informon se është ndërprerë kontrata me “Energoinvest” ShPK Sarajevë, Bosnjë dhe Hercegovinë, kontraktues për ndërtimin e largpërçuesit 400 kV nga TS Manastir 2 deri në kufirin Maqedoni e Veriut – Shqipëri.
Mospërmbushja e detyrimeve nga kontraktori dhe kërkesat e tyre për pagesa shtesë çuan në ndëprerjen e patjetërsueshme të kontratës. Kjo situatë rezultoi me pamundësinë për të arritur një dakordësi midis dy palëve.
Kontrata me “Energoinvest” ShPK Sarajevë, Bosnjë dhe Hercegovinë, është lidhur më 7 shkurt 2020, me afat të përfundimit prej 30 muajsh. Afati ka skaduar më 30.05.2023.
Duhet theksuar se gjatë kësaj periudhe kontraktori është larguar disa herë nga punishtja duke kërkuar pagesë shtesë, gjë e cila është refuzuar nga ShA MEPSO për shkak të llojit të kontratës, “çelës në dorë”. Përkundër përpjekjeve të njëpasnjëshme të ShA MEPSO për dakordësim dhe negocim, nuk u arrit marrëveshje. Prandaj, ShA MEPSO mori vendimin e patjetërsueshëm për ndërprerjen e kontratës.
Që nga fillimi i projektit, deri tani janë realizuar 24 nga 269 fundamentet e planifikuara të shtyllave (8.9%), ndërsa janë sjellur 51.2% e pajisjeve.
Duke marrë parasysh situatën aktuale, zhagitjen e punëve dhe braktisjen e tërësishme të njëanshme të punës nga kontraktori, vlerësojmë se ndërprerja e kësaj kontrate në fakt paraqet fillimin e përfundimit të këtij projekti, i cili është prioritet kryesor për ShA MEPSO dhe Qeverinë e Republikës së Maqedonisë së Veriut.
ShA MEPSO mbetet e përkushtuar për përfundimin e interkonektorit 400 kV me Shqipërinë dhe tashmë kanë filluar përgatitjet për rifillimin e projektit. Shoqëria do të inicojë procedurë të re të furnizimit sipas udhëzimeve të BERZH-it për të zgjedhur një kontraktor të ri që do të vazhdojë me realizimin e projektit.
Zbatimi i suksesshëm i këtij interkonektori mbetet prioritet për ShA MEPSO, pasi do të forcojë stabilitetin dhe integrimin energjetik rajonal, me përfitime të konsiderueshme për Maqedoninë e Veriut, Shqipërinë dhe rajonin në tërësi”, bëjnë të ditur nga MEPSO.
Kujtojmë se tema e parë në emisionin “Biznes 21” ishte hulumtimi “Ku përfunduan 50 milionë euro për lidhjen tonë energjetike me Shqipërinë?!” Si mundet, pas 10 viteve premtime dhe 50 milionë eurove të siguruara që nga viti 2015 sot kemi vrimë financiare dhe projektet strategjike nuk lëvizin nga vendi.
Largpërçuesi interkonektor me Shqipërinë ishte edhe temë e pyetjeve të deputetëve në Kuvend. Kryeministri Hristijan Mickoski nga foltorja që nga fundi i nëntorit paralajmëroi anulim të marrëveshjes dhe akuzoi për krim me përmasa epike.
Hulumtimi i Biznes 21 nga terreni zbuloi se ka ngecur njëra pjesë nga projekti – Largpërçuesi Manastir 2 – Elbansan. Në vend të largpërçuesit të ndërtuar, atje hasëm në livadhe të shkreta. Pajisja e cila është sjellë me vite qëndron në depot e vendit. Kompania Energoinvest nga Sarajeva edhe përkundër afateve të tejkaluara, kërkon 7 deri në 8 milionë euro Aneks të marrëveshjes. Zbuluam se edhe nënkontraktor i Energoinvest në 2021 është kompania e biznesmeni Nefi Useini, i njohur në opinion si këshilltar i atëhershëm në komunën e Ohrit, i cili u akuzua për sjellje të dhunshme dhe për ndërtim pa leje.
Në pjesën tjetër të projektit, Trafostanica afër Ohrit punët zhvilloheshn me dinamikë të përshpejtuar. Atje kontraktor është Konçar nga Zagrebi që e fitoi tenderin në vlerë prej 17 milionë eurove. Hulumtimi tregoi se këtë pranverë kompania mori edhe Aneks me 3 milionë euro shtesë.
LEXO: