Debati ka marrë fund, nëse ka ekzistuar ndonjëherë. Leo Messi është shpallur “futbollisti më i mirë i të gjitha kohërave” nga Federata Ndërkombëtare e Historisë dhe Statistikave të Futbollit (IFFHS). Ky institucion i njohur, i themeluar në vitin 1991 për të mbledhur dhe analizuar të gjitha të dhënat lidhur me futbollin në shkallë globale, nuk lë vend për dyshime: argjentinasi është numri një.
Ylli nga Rosario kryeson një listë legjendash që përfshin bashkëkombasin e tij Diego Armando Maradona, Pelé, Johan Cruyff dhe rivalin e përhershëm Cristiano Ronaldo. Të gjithë këta janë në renditje, por askush përpara “Pleshtit”.
Në moshën 37-vjeçare, legjenda e Barcelonës, aktualisht tek Inter Miami në MLS, mund të krenohet si lojtari me më shumë trofe në histori (46) dhe si fituesi rekord i “Topit të Artë” (8 herë). Koleksioni i tij i titujve, çmimeve dhe rekordeve është i pafund. Për shkak të rregullsisë së tij, ndikimit në të gjitha aspektet e lojës dhe aftësisë për të qenë më i miri për kaq shumë sezone, IFFHS e ka kurorëzuar si më të madhin e të gjithëve.
Pelé dhe Maradona në podium
Pas Messit renditet Edson Arantes do Nascimento, Pelé, i cili u nda nga jeta më 29 dhjetor 2022 në São Paulo. Braziliani mbetet i vetmi lojtar me tri Kupa Bote të fituara, loja e tij ishte revolucionare për kohën. Gjatë karrierës së tij, vetëm lojtarët europianë mund ta fitonin “Topin e Artë”, ndaj “France Football” vlerësoi në vitin 2016 se po të kishte qenë i kualifikuar, Pelé do të kishte fituar shtatë “Topa të Artë”, vetëm një më pak se Messi.
Podiumin e plotëson Diego Armando Maradona, i cili u nda nga jeta më 25 nëntor 2020 në Buenos Aires. I konsideruar nga shumë si talenti më i madh individual që ka prodhuar ndonjëherë futbolli, “Pibe d’Oro” ishte një gjeni që dhuroi spektakël në skenat më të mëdha. Sipas “France Football”, ai do të kishte fituar dy “Topa të Artë”, po të kishte qenë europian. Trashëgimia e tij, e lidhur përjetësisht me atë të Messit, mbetet gjithmonë e gjallë.
The post IFFHS i jep fund debatit: Leo Messi, futbollisti më i mirë i të gjitha kohërave appeared first on Telesport.