Real Madrid ka fituar 3-1 ndaj Pachuca në ndeshjen e dytë për grupin H, për Kupën e Botës për Klube. Madrilenët e nisën shumë keq takimin, duke mbetur me një lojtar më pak që në minutën e 6-të.
Raul Asencio u përjashtua me karton të kuq si lojtar i fundit pasi mbajti nga fanella sulmuesin e Pachuca-s, Rondon. Ndeshjen e parë në grup, Asencio shkaktoi penallti, nga e cila erdhi goli i barazimit për Al-Hilal, ndërsa sot bëri një tjetër gafë, duke lënë fushën e lojës pas 6 minutash.
Në minutën e 35-të, Real Madrid kaloi në avantazh. Pas një topi të marrë nga Fran Garcia dhe një veprimi të bukur brenda zonës, Jude Bellingham, dërgon topin në rrjetë. Në minutën e 43-të, Real Madrid shënoi golin e dytë, pas një aksioni të shpejtë dhe kombinimi fantastik mes Gonzalo Garcia dhe Güler. Fantazisti turk dërgon topin në rrjetë, madrilenët e mbyllin pjesën e parë në avantazh të dyfishtë.
Në minutën e 70-të ishte radha e Federico Valverde për të shënuar golin e tretë, pas një kombinimi të bukur me Brahim Diaz. Në minutën e 80-të, meksikanët do të shënonin golin e nderit me Elias Montiel, i cili realizoi një gol shumë të bukur me një goditje të fortë nga jashtë zonës së rreptësisë.
Real Madrid fiton përfundimisht 3-1 dhe merr momentalisht kryesimin e grupit H me 4 pikë, ndërkohë në mesnatë luhet ndeshja tjetër e këtij grupi mes Salzburg dhe Al-Hilal.
The post Kupa e Botës për Klube: Real Madrid bën detyrën ndaj Pachuca dhe merr kryesimin e grupit (video) appeared first on Telesport.