Në gjysmën e parë të vitit 2025, Stopanska Banka SHA – Shkup ka realizuar fitim para tatimit prej 2,02 miliardë denarë, që është 2% më shumë krahasuar me të njëjtën periudhë të vitit të kaluar. Banka ka ruajtur stabilitetin financiar, pavarësisht pasigurisë ekonomike në vend dhe jashtë tij, transmeton bankarstvo.mk.
Të ardhurat nga interesat ranë me 6%, ndërsa nga komisionet me 7%, për shkak të normave më të ulëta dhe uljes së tarifave për klientët. Megjithatë, fitimet nga kursi i këmbimit u rritën me 30%, dhe banka arriti të ulë rezervat për humbje nga kreditë me 27%.
Shpenzimet operative u rritën me 10%, por banka mbeti efikase në punën e saj. Totali i aktiveve arriti në 150,5 miliardë denarë, ndërsa kreditë për klientët në 101,2 miliardë. Likuiditeti dhe baza e depozitave mbeten të forta.
Banka pagoi rreth 4 miliardë denarë në dividendë për aksionarët dhe ruajti një normë të lartë kapitali prej 20,54%, që tregon stabilitet të lartë financiar.
Fokusi i bankës mbetet në digjitalizim, zhvillim të produkteve të reja, përgjegjësi mjedisore dhe mbështetje për arsimin. Pritet rritje ekonomike e lehtë në muajt në vijim, megjithatë mbeten sfida si inflacioni dhe pasiguria globale.