Momente paniku të vërtetë për Danilo Gallinari dhe bashkëshorten e tij, Eleonora Boi, gazetare me të shkuar në “Mediaset”, e cila, sipas raportimeve nga mediat lokale, është sulmuar dhe kafshuar nga një peshkaqen pasditen e djeshme në plazhin “Isla Verde”, në veri të Porto Rikos.
Gruaja, që është shtatzënë, mori menjëherë ndihmën e parë në këmbën e plagosur dhe më pas u transportua në “Centro Medico Rio Piedras”. Sipas autoriteteve lokale, gjendja e saj është e qëndrueshme dhe jo në rrezik për jetën.
Nga të dhënat e para, mësohet se Boi ndodhej në ujë kur papritur një peshkaqen e kafshoi në kofshën e djathtë. Sulmi i shkaktoi një plagë të thellë, por fatmirësisht ndihma mjekësore ndërhyri me shpejtësi duke e çuar menjëherë në spital për trajtim. Mediat nuk kanë dhënë ende detaje mbi llojin e peshkaqenit apo përmasat e sakta të plagës, por burimet zyrtare flasin për një situatë të stabilizuar dhe nën kontroll.
Ngjarja ka marrë jehonë të madhe në mediat italiane dhe ndërkombëtare, duke shkaktuar shqetësim edhe te tifozët e Danilo Gallinari, i cili është aktualisht i angazhuar në fazën “play-off” të kampionatit të Porto Rikos. Çifti, shumë i ndjekur në rrjetet sociale, nuk ka dhënë ende ndonjë deklaratë zyrtare.
The post Tmerr në plazhin e Porto Rikos, gruaja shtatzënë e basketbollistit të njohur kafshohet nga peshkaqeni appeared first on Telesport.