Britania do të ndërmarrë “një hap të guximshëm në një kohë shumë të vështirë” duke njohur zyrtarisht një shtet palestinez, sipas ministres së jashtme të autoritetit, e cila tha se beson që njoftimi – që pritet në ditët në vijim – do të frymëzojë më shumë kombe të ndjekin shembullin.
Ministrja e Jashtme e Autoritetit Palestinez, Varsen Aghabekian, tha se masa e Britanisë ishte “më mirë vonë sesa kurrë” dhe tha se “Britania, me peshën e saj, mund të ndikojë te vendet e tjera që të dalin përpara dhe ta njohin, sepse kjo është gjëja e duhur për t’u bërë”.
Por ajo tha gjithashtu se është “shumë e zemëruar” me Shtëpinë e Bardhë për “mbështetjen e palëkundur” të saj për Izraelin.
Aghabekian po fliste ndërsa Britania, së bashku me Francën , Kanadanë dhe Australinë , përgatiten të njohin zyrtarisht shtetin e Palestinës në Kombet e Bashkuara, shkruan skynews.
“Britania e Madhe ka kohë që mbështet ekzistencën dhe lulëzimin e Izraelit, por mendoj se sot Britania e Madhe po e sheh çështjen në mënyrë objektive, në aspektin e të drejtave të njeriut, në aspektin e respektimit të ligjit ndërkombëtar dhe në aspektin e të ardhmes së kësaj zone si për izraelitët ashtu edhe për palestinezët.”
Ajo hodhi poshtë idenë se njohja e Palestinës ishte një shpërblim për terrorizmin e Hamasit, duke thënë se “mosnjohja” do të ishte gjithashtu një “shpërblim për ekstremistët” dhe tha se “nëse presim derisa Izraeli të vendosë se dëshiron të hyjë në negociata me palestinezët, atëherë kjo nuk do të ndodhë”.
Ndryshe, Shteti i Palestinës është njohur tashmë nga tre të katërtat e anëtarëve të Kombeve të Bashkuara.
Ai përfshin dy territore të ndara – Bregun Perëndimor, duke përfshirë Jerusalemin Lindor, dhe Rripin e Gazës. Së bashku, ato njihen zyrtarisht si Territoret e Pushtuara Palestineze.
Bregu Perëndimor ka qenë subjekt i pushtimit ushtarak izraelit që nga viti 1967, ndërsa Gaza është sulmuar nga Izraeli që nga sulmet e Hamasit më 7 tetor 2023, kur u vranë gati 1,200 izraelitë dhe rreth 250 njerëz u morën peng.
The post “Më mirë vonë se kurrë” – Palestina mirëpret vendimin e Britanisë për njohje appeared first on Alsat.