Zgjedhjet lokale në Maqedoninë e Veriut kanë prodhuar një sërë surprizash, që nga fitoret e disa kandidatëve që nuk konsideroheshin favoritë në sondazhet parazgjedhore, e deri te dështimi i censusit në disa komuna.
Një ndër zhvillimet që ka ngjallur debat të gjerë është rezultati në fshatin Luboten, ku kandidati i VMRO-DPMNE-së, Darko Kostovski, ka fituar 402 vota – një shifër që ka befasuar opinionin publik dhe është cilësuar si e pazakontë dhe shq etësuese, duke pasur parasysh strukturën etnike të këtij fshati, e cila është mbi 98% shqiptare.
Ky rezultat merr një dimension edhe më kompleks kur merret parasysh konteksti historik i Lubotenit. Pikërisht në këtë fshat, më 12 gusht 2001, ndodhi një nga ngjarjet më tragjike të konfliktit të armatosur në Maqedoninë e Veriut, ku forcat maqedonase kryen një masakër ndaj civilëve shqiptarë, duke lënë të vrarë 10 persona të pafajshëm. Për këtë krim, Gjykata Ndërkombëtare për Krime në ish-Jugosllavi në Hagë dënoi komandantin Johan Tarçullovski, duke vërtetuar aktin si një shkelje e rëndë e të drejtave të njeriut dhe e ligjeve të luftës.
Në këtë kuadër, fakti që një kandidat i një partie e cila historikisht është identifikuar me retorikë nacionaliste maqedonase ka marrë mbështetje të konsiderueshme në një fshat me shumicë dërrmuese shqiptare – dhe me një histori të tillë të dhimbshme – ngrit pikëpyetje serioze, jo vetëm për prapaskenat e mundshme elektorale, por edhe për vetëdijen politike, përfaqësimin lokal dhe procesin e reflektimit kolektiv mbi të kaluarën.