Policia spanjolle arrestoi këtë të premte 13 persona të akuzuar se i përkisnin qelizës së parë të bandës kriminale “Tren de Aragua” të Venezuelës të zbuluar në vendin iberik.
Arrestimet erdhën pas bastisjeve në pesë qytete të vendit.
Policia tha se arrestimet u kryen në Barcelonë, Madrid, Girona, A Coruna dhe Valencia pas një hetimi mbi përpjekjet e dyshuara të grupit për të zgjeruar operacionet e tij në Spanjë, ku venezuelasit përbëjnë një nga komunitetet më të mëdha të emigrantëve.
Oficerët sekuestruan drogë sintetike, kokainë, një plantacion marijuane dhe dy laboratorë që prodhonin “tusi”, e njohur edhe si kokainë rozë, një substancë që dihet se banda e trafikon.
Operacioni vjen pas një arrestimi në vitin 2024 në Barcelonë të vëllait të udhëheqësit të dyshuar të bandës, i cili u akuzua se po përpiqej të zgjeronte grupin në Spanjë.
Tren de Aragua, e formuar fillimisht në burgjet e Venezuelës, është kthyer në një nga rrjetet kriminale transnacionale më të dhunshme të Amerikës Latine, e lidhur me drogën, trafikimin e qenieve njerëzore dhe zhvatjen.
Shtetet e Bashkuara e klasifikuan atë këtë vit si një organizatë terroriste globale, duke përmendur shtrirjen e saj përtej rajonit.
The post Banda venezueliane shtrihet në Spanjë/ Policia zbulon celulën, 13 të arrestuar në pesë qytete appeared first on Alsat.