Negociatorët e Këshillit të BE-së dhe Parlamentit Evropian arritën një marrëveshje mbi Buxhetin e BE-së për vitin 2026 herët këtë mëngjes, i cili duhet të përqendrohet në përmbushjen e prioriteteve të Unionit dhe adresimin e sfidave aktuale.
Në Buxhetin e miratuar, parashikohet një total prej 192.768 miliardë eurosh për “angazhime” dhe 190.092 miliardë euro për “pagesa”. Një shumë shtesë prej 715.7 milionë eurosh nga Buxheti i këtij viti do të transferohet në vitin tjetër për nevoja dhe shpenzime të paparashikuara. “Angazhimet” janë kosto për aktivitetet e kryera gjatë disa viteve financiare, ndërsa “pagesat” mbulojnë shpenzimet për angazhimet vetëm për vitin aktual.
Buxheti i BE-së për vitin e ardhshëm pritet të rrisë konkurrueshmërinë, të forcojë gatishmërinë mbrojtëse të Evropës, të ofrojë mbështetje për ndihmën humanitare, të adresojë presionet migratore dhe të mundësojë një përgjigje të shpejtë dhe efikase ndaj nevojave dhe krizave të paparashikuara.
Nga totali i fondeve për “angazhime” për artikullin “treg i vetëm, inovacion dhe teknologji dixhitale” parashikohen 22.163 miliardë euro, për “kohezionin, qëndrueshmërinë dhe vlerat” – 71.65 miliardë, për “burimet natyrore dhe mjedisin” – 56.529 miliardë, për “migrimin dhe menaxhimin e kufijve” – 5.019 miliardë, për “sigurinë dhe mbrojtjen” – 2.814 miliardë, për “fqinjësinë dhe botën” – 15.6 miliardë, për “administratën publike” – 13.278 miliardë dhe për “instrumentet speciale” – 5.716 miliardë euro.
Në seksionin “pagesa”, 23.337 miliardë euro janë ndarë për “tregun e vetëm, inovacionin dhe teknologjitë dixhitale”, 73.167 miliardë për “kohezionin, qëndrueshmërinë dhe vlerat”, 52.577 miliardë për “burimet natyrore dhe mjedisin”, 3.888 miliardë për “migrimin dhe menaxhimin e kufijve”, 2.253 miliardë për “sigurinë dhe mbrojtjen”, 16.57 miliardë për “fqinjësinë dhe botën”, 13.278 miliardë për “administratën publike” dhe 5.022 miliardë për “instrumentet speciale”.
Fondet totale për “angazhimet” janë në nivelin e një përqind të PBB-së së BE-së, dhe “pagesat” në 0.99 përqind të PBB-së evropiane.
Me Buxhetin e harmonizuar për vitin e ardhshëm, krahasuar me propozimin fillestar të Komisionit Evropian, janë rritur fondet për programin e kërkimit shkencor “Horizon Europe”, për rrjetet e transportit dhe energjisë, për mbrojtjen civile dhe për bujqësinë.
Përndryshe, ky është Buxheti i gjashtë vjetor brenda Kornizës Financiare Shumëvjeçare për periudhën 2021-2027.
Këshilli dhe Parlamenti Evropian tani kanë 14 ditë për të miratuar zyrtarisht marrëveshjen e arritur për Buxhetin e vitit 2026.
Sipas njoftimeve, Këshilli i BE-së duhet ta miratojë Buxhetin më 24 nëntor. Për të miratuar Buxhetin kërkohet shumicë e kualifikuar brenda Këshillit.
Në Parlamentin Europian, Komiteti i Buxhetit është planifikuar të votojë për propozimin më 20 nëntor, pas së cilës ai duhet të miratohet në seancën plenare parlamentare, e cila do të mbahet nga 24 deri më 27 nëntor në Strasburg.
The post BE arrin marrëveshje për buxhetin e vitit 2026 me vlerë 192.8 miliardë euro appeared first on Alsat.