Zëvendësministri i Ekonomisë dhe Punës Marjan Risteski, në emisionin “Biznes21” në TV21, theksoi se prioritet i Qeverisë është stabilizimi dhe përmirësimi i gjendjes ekonomike, si bazë për rritjen e pagave dhe përmirësimin e standardit të jetesës së qytetarëve.
Duke iu përgjigjur pyetjes pse paga minimale nuk ishte vendosur si pikë e veçantë në rendin e ditës të Këshillit Ekonomiko-Social, Risteski theksoi se Këshilli gjithmonë ka pasur rend dite të hapur dhe se kjo çështje ka mundur të hapet nën pikën “të ndryshme”.
“Asnjë pikë nuk është refuzuar ndonjëherë nga partnerët socialë. Qëndrimi ynë është i njëjtë prej më shumë se një viti – për pagën minimale jemi të gatshëm të diskutojmë nëse ekziston një mundësi e hapur, ndërsa një pas të hapur ua lëmë sindikatave dhe punëdhënësve që të merren vesh”, deklaroi Risteski.
Tutje Risteski theksoi se Qeveria ndërhyn vazhdimisht në drejtim të përmirësimit të standardit të jetesës, por se kjo duhet të bazohet në tregues realë ekonomikë dhe jo në zgjidhje politike apo ad-hoc.
“Kemi pasur një vit stabilizimi. Nga një gjendje katastrofike arritëm ta stabilizojmë ekonominë dhe tani kemi parametra që lëvizin në drejtim pozitiv. Kjo do të thotë se pagat do të rriten, përfshirë edhe pagën minimale”, theksoi zëvendësministri i Ekonomisë dhe Punës, Marjan Risteski.
Sipas Risteskit, ndërhyrjet e pamenduara dhe të shpejta në ekonomi mund të shkaktojnë tronditje serioze, ndaj Qeveria, siç tha ai, udhëhiqet nga parimi i rritjes së qëndrueshme dhe stabilitetit afatgjatë.
“Jo politikëbërjes dhe zgjidhjeve ad-hoc që do të shkaktonin tronditje të mëdha në ekonomi”, porositi Risteski në emisionin “Biznes21” në TV21.