Edhe pse shpesh shoqërohet me teknologji të përparuar dhe kulturë urbane, Japonia është gjithashtu vendi me më shumë dëborë në botë. Sipas të dhënave nga AccuWeather, tre qytete japoneze me mbi 100,000 banorë kryesojnë listën botërore për reshjet vjetore të dëborës – shumë përpara Kanadasë, Rusisë ose Norvegjisë.
Shembulli më ekstrem është Aomori, i konsideruar si qyteti më me dëborë në planet. Kryeqyteti i Prefekturës Aomori, në ishullin më të madh të Japonisë, Honshu, merr mesatarisht 7.9 metra dëborë çdo vit. Nga nëntori deri në prill, rrugët janë të rrethuara nga mure të larta dëbore dhe akulli, të cilat rriten më lart me çdo pastrim të rrugëve.
Sapporo, qyteti më i madh në ishullin Hokkaido, përballet me sfida të ngjashme çdo dimër. Ai merr mesatarisht 4.85 metra borë në vit, gjë që nuk është rastësi që ky qytet pret festivalin e famshëm dimëror Yuki Matsuri, i cili paraqet skulptura monumentale të bëra nga bora dhe akulli.
Sasi të mëdha bore bien edhe në Toyama, një qytet në bregdetin e Detit të Japonisë, ku mesatarja është rreth 3.6 metra borë në vit.
Meteorologët shpjegojnë se reshjet e dendura të dëborës në Japoni janë rezultat i një kombinimi unik faktorësh klimatikë. Gjatë dimrit, ajri i ftohtë nga Siberia lëviz drejt lindjes dhe kalon mbi Detin e Japonisë. Meqenëse deti është më i ngrohtë se ajri, formohen re të pasura me lagështi, të cilat, kur përplasen me malet japoneze, ftohen ndjeshëm dhe lagështia shndërrohet në borë të trashë. Në disa rajone, bora mund të bjerë për ditë të tëra pa u ndalur.
Për më tepër, Japonia mban rekordin botëror për trashësinë më të madhe të matur të borës. Në malin Ibuki, në shkurt të vitit 1927 u matën 11.82 metra borë – një rekord që nuk është thyer për gati një shekull.
The post Vendi ku bora matet në metra dhe reshjet i kalojnë shtëpitë appeared first on Alsat.