Re të dendura gaz lotsjellës mbulojnë Pazarin e Madh historik në Teheran, ndërsa demonstruesit përpiqen të largohen nga zona. Forcat e sigurisë përdorën gaz lotsjellës për të shpërndarë protestuesit.
Të njëjtën ditë, departamenti i inteligjencës i Iranit njoftoi se kishin arrestuar individë kyç të dyshuar për organizimin e trazirave.
Televizioni shtetëror iranian pranoi për herë të parë numrin e lartë të viktimave, duke cituar një zyrtar që tha se kishte “një numër të lartë dëshmorësh.” Aktivistët raportuan mbi 2,000 të vdekur, ndërsa Agjencia e Lajmeve për Aktivistët e të Drejtave të Njeriut, me seli në SHBA, raportoi 2,003 viktima.
Dhjetëra mijëra persona morën pjesë në funeralin masiv pranë Universitetit të Teheranit. Arkivolet, të mbuluara me flamuj dhe trëndafila, ishin vendosur në kamionë. Turma brohoriste dhe rrihte gjoksin, ndërsa ceremonia u transmetua drejtpërdrejt. Televizioni shtetëror raportoi 300 arkivole, por gazetarët e AP panë rreth 100.
Presidenti Donald Trump tha të martën se kishte anuluar “të gjitha takimet” me zyrtarët iranianë. Ai i bëri thirrje iranianëve të vazhdojnë protestat dhe tha se “ndihma po vjen,” pa dhënë detaje. Trump tha gjithashtu se do të “veprojë në përputhje me situatën.”
“Mesazhi është që ata duhet të tregojnë njerëzillëk, kanë një problem të madh dhe shpresoj që të mos po vrasin njerëz, dhe unë do të kem një raport shumë shpejt. Më duket se janë sjellë keq, por kjo nuk është konfirmuar”, tha Trump.
Komanda Qendrore e SHBA-së (CENTCOM) njoftoi hapjen e një qelize të re operacioni mbrojtjeje ajrore në bazën Al Udeid në Katar për të forcuar mbrojtjen ajrore dhe raketore. Ministri i Mbrojtjes i Iranit, Aziz Nasirzadeh, paralajmëroi se Irani do të përgjigjet vendosmërisht ndaj çdo akti të ri agresioni dhe se vendet që ndihmojnë SHBA-në do të bëhen objektivë të ligjshëm.