Zëvendëspresidenti i Shteteve të Bashkuara, J.D. Vance, deklaroi të enjten se Donald Trump vazhdon të preferojë një zgjidhje diplomatike me Iranin, duke theksuar se administrata amerikane mbetet e përkushtuar ndaj dialogut, pavarësisht tensioneve në rritje.
Në një intervistë për Fox News, Vance theksoi se presidenti ka qenë i qartë në qëndrimin e tij: Irani nuk duhet të pajiset me armë bërthamore. Sipas tij, kjo synohet të arrihet përmes kanaleve diplomatike, ndërsa pritet një raund i ri bisedimesh mes dy palëve.
I pyetur nëse Uashingtoni dëshiron largimin nga pushteti të udhëheqësit suprem të Iranit, Ali Khamenei, zëvendëspresidenti amerikan shmangu një përgjigje të drejtpërdrejtë.
Ndërkohë, administrata amerikane njoftoi vendosjen e sanksioneve të reja ekonomike ndaj Teheranit, me qëllim dobësimin e regjimit dhe kufizimin e të ardhurave nga eksporti i naftës. Këto masa vijnë në prag të takimit të planifikuar mes delegacioneve në Geneva.
Nga ana tjetër, Trump akuzoi Iranin për zhvillimin e raketave që mund të kërcënojnë Evropën dhe bazat amerikane, si dhe për përpjekje për të siguruar sisteme më të avancuara armësh, të afta për të goditur edhe territorin amerikan.