Sipas nënkryetarit të BDI Arjanit Hoxha, partitë politike maqedonase kanë investuar shumë pak për të punuar me maqedonasit dhe për t’i bindur se Marrëveshja Kornizë e Ohrit dhe përfitimet që shqiptarët kanë nga kjo marrëveshje nuk janë marrje e ndonjë të drejte të dikujt tjetër apo e ndonjë territori tjetër të veprimit politik. Nënkryetari i BDI-së këtë e deklaroi në një intervistë për “360 Gradë” në MRT 1.
360°: Çfarë mendoni ju – a punon koha në interes të BDI-së sepse pushteti e konsumon VLEN-in apo e kundërta, që nuk punon në interes të BDI-së sepse VLEN po arrin të konsolidohet tek votuesit?
Hoxha: Le ta them kështu, do të jap një pamje tjetër që të mos duket se po e mendojmë këtë vetëm në mënyrë partiake. Mendoj se koha, me mënyrën se si vepron VLEN brenda shtetit, po shkon në drejtim të kundërt me interesat e shqiptarëve në shtet. Dhe në vend që të mendojmë si të bëjmë reforma, si të ecim përpara, si ta hapim rrugën drejt Bashkimit Evropian që është e bllokuar, ne po kthehemi në tema që duhej të ishin mbyllur para shumë vitesh, dhe për të cilat unë jam i bindur se duhej të ishin mbyllur, siç është ligji për gjuhët.
360°: Çfarë është me ligjin për gjuhët? Ai ekziston dhe është në fuqi.
Hoxha: Po, por cila është implementimi? Ju keni interpretime personale të ministrit të Drejtësisë. Keni ministra që interpretojnë se duhet kështu apo ashtu. Ligji është i qartë dhe i prerë.
360°: E dini cili është kundërargumenti – ai ligj u miratua në vitin 2018 dhe hyri në fuqi në vitin 2019 dhe të paktën pesë vite ishte në fuqi në periudhën kur BDI ishte në qeveri. Dhe tani BDI hap tema që mund t’i kishte zgjidhur atëherë, pasi ligji ishte në fuqi.
Hoxha: Nuk është e vërtetë. Nuk dua të mbroj askënd për veprimet politike para ardhjes sime si nënkryetar, por po ju them se nga miratimi i ligjit janë krijuar Agjencia për zbatimin e gjuhës dhe Inspektorati. Në kohën kur isha ministër kishim takime të rregullta se si ta rregullojmë implementimin. Dhe papritmas ju keni ndalimin e të gjitha atyre proceseve.
360°: Për shembull, përdorimi në proceset gjyqësore. Pse nuk u realizua atëherë? Sepse edhe BDI e kishte të qartë që kjo ishte më shumë simbolike dhe nuk mund të funksiononte?
Hoxha: Shikoni, ligji është shumë i qartë dhe shumë i saktë. Dhe për këtë është edhe problemi me provimin e jurisprudencës. Ju nuk mund t’u thoni papritur studentëve që katër vite kanë studiuar në gjuhën shqipe se nuk mund ta bëjnë këtë në shqip. Ky është një provim profesional.
360°: Por a mund të bëhej deri tani?
Hoxha: Po krijohet problem. Unë jam politikan që flet – kur të jem pjesë e pushtetit, mund të them për atë që është përgjegjësia ime dhe a e përmbush apo jo. Aktualisht dikush tjetër i ka mundësitë për t’i rregulluar këto gjëra. Dhe mendoj se logjika për të pyetur pse këta nuk e bënë dhe për ta lënë të papërfunduar nuk është amnisti për politika të gabuara.
360°: Jo, por është një pyetje kredibile sepse ligji ishte në fuqi pesë vite ndërsa BDI ishte në pushtet.
Hoxha: Unë di një gjë – se ajo që po ndodh aktualisht në shtet në pjesën e të drejtave të shqiptarëve që burojnë nga Marrëveshja Kornizë e Ohrit po e dëmton lëvizjen kohezive të asaj që kemi ndërtuar nga viti 2002 e këtej. Dhe është për të ardhur keq që të gjithë politikanët bëhen peng i përplasjeve për këtë temë dhe nuk shohim përpara. Thjesht dhe qartë. Për shembull, BDI ka miratuar rezoluta nga Kongresi ku është evidentuar se ne nuk kemi ditur që do të vijnë përfaqësues të tillë të shqiptarëve. Nuk ishte parashikuar që do të vijnë kuadro kaq të dobëta dhe politikanë kaq të dobët te shqiptarët që do të lejojnë në heshtje të kalojë gjithçka. Dhe për këtë është thënë se problemi në Gjykatën Kushtetuese është që nëse një ligj miratohet me Badinter, atëherë duhet të vlerësohet edhe aty me Badinter. Sepse cila është logjika e demokracisë konsociative dhe moslejimit të majorizimit të më të madhit ndaj më të voglit?
360°: Zoti Hoxha, edhe ju e dini që Marrëveshja Kornizë e Ohrit dhe amendamentet që dolën prej saj janë një balancë delikate politike, një marrëveshje në atë moment mes maqedonasve dhe shqiptarëve, dhe çdo rihapje e saj do të ishte një tronditje e madhe.
Hoxha: Nuk po flasim për rihapje. Kjo nuk është rihapje. Kjo është në frymën e asaj si është ndërtuar dhe si është parashikuar të funksionojë Marrëveshja Kornizë e Ohrit. Ne kërkojmë thjesht saktësim të asaj që është dakorduar… Është për të ardhur keq që shumë pak kanë investuar partitë politike maqedonase për të punuar me popullin dhe me maqedonasit për t’i bindur se Marrëveshja Kornizë e Ohrit dhe përfitimet që kanë shqiptarët nga ajo marrëveshje nuk janë marrje e ndonjë të drejte të dikujt tjetër apo e ndonjë territori tjetër politik. Ne po flasim për ndërtimin e një shteti të përbashkët ku për çështje që na prekin neve, si gjuha, identiteti dhe të ngjashme, të mund të vendosim dhe të mos lejohet majorizimi. Dhe kur dëgjoni se çfarë thotë, për shembull, kryetari i Gjykatës Kushtetuese, që fatkeqësisht duhet ta komentojmë, por kjo tashmë është politike, jo juridike, dhe kur e shihni si ai i interpreton politikisht dhe jo juridikisht çështjet nga Marrëveshja Kornizë e Ohrit, e kuptoni se kemi nevojë për një “reset” për të bërë një marrëveshje të përbashkët për zhvillim dhe jo për përplasje.
Burimi: “360 Gradë” (MRT 1)