Tragjedia ka tronditur komunitetin e zhytësve, pasi viktimat nuk ishin turistë, por persona me përvojë, për të cilët deti ishte profesion ose objekt studimi, raportojnë mediat italiane. Universiteti i Gjenovës ka shprehur ngushëllime, duke theksuar humbjen e madhe njerëzore dhe akademike. Një informacion i rëndësishëm nga hetimet është se zhytja fatale nuk ishte pjesë e një projekti kërkimor të udhëhequr nga profesori Montefalcone, por një ekskursion privat zhytjeje.
Hetime për shkaqet e mundshme
Burime zyrtare konfirmuan se grupi kishte tentuar të eksploronte shpellat në një thellësi prej rreth 50 metrash, ndërsa Forcat e Mbrojtjes së Maldiveve njoftuan se në shpellë është gjetur të paktën një trup, ndërsa viktimat e tjera mund të ndodhen në një thellësi prej rreth 60 metrash. Kjo thellësi e klasifikon aktivitetin si zhytje teknike, e cila ndryshon ndjeshëm nga zhytja rekreative. Sipas standardeve ndërkombëtare, kufiri për zhytjet rekreative është 40 metra. Çdo zhytje më e thellë kërkon trajnim të specializuar, pajisje të posaçme dhe planifikim rigoroz.
Ekspertët po shqyrtojnë disa hipoteza, ndërsa një nga më të mundshmet është helmimi me oksigjen, fenomen i shkaktuar nga presioni i tepërt parcial i oksigjenit në përzierjen e frymëmarrjes në thellësi të mëdha. Edhe pse shkaku ende nuk është konfirmuar, kjo mundësi po hetohet seriozisht, veçanërisht nëse zbulohet përdorim i gabuar i cilindrave ose ndonjë gabim në përbërjen e gazit, raportojnë mediat italiane.
Një tjetër element që po merret në konsideratë janë kushtet e këqija atmosferike. Mediat maldiviane raportuan se reshje të dendura shiu, stuhi me bubullima dhe erëra të forta kanë goditur arkipelagun më 13 dhe 14 maj.
Aksidenti më i rëndë i zhytjes në Maldive
Besohet se kjo është tragjedia më e rëndë e zhytjes në historinë e shtetit ishullor në Oqeanin Indian, një destinacion turistik i njohur për ishujt koralorë. Policia konfirmoi se në momentin e aksidentit, zona rreth 100 kilometra në jug të kryeqytetit Male ndodhej nën kushte të këqija atmosferike dhe se ishte në fuqi paralajmërimi i verdhë për anijet turistike dhe peshkatarët.
Megjithëse aksidentet gjatë zhytjes janë relativisht të rralla në Maldive, vitet e fundit janë regjistruar disa raste fatale. Dhjetorin e kaluar, një zhytëse britanike me përvojë humbi jetën pranë resortit ishullor Ellaidhoo, ndërsa bashkëshorti i saj ndërroi jetë pesë ditë më vonë. Në vitin 2024, një deputet japonez humbi jetën gjatë një zhytjeje në atolën Lhaviyani.