FIFA ka njoftuar se arbitri australian Alireza Faghani do të ndajë drejtësinë në përballjen mes Anglisë dhe Meksikës në fazën e 1/16 së finales, një emërim që nga shumëkush është cilësuar si i diskutueshëm.
Anglia po përgatitet për një ndeshje me eliminim direkt ndaj njërit prej vendeve organizatore të turneut, ndërsa ditët para takimit janë shoqëruar me paqartësi dhe ndryshime rreth orarit të zhvillimit.
Fillimisht, ndeshja ishte planifikuar të niste të dielën në orën 18:00 sipas kohës lokale (02:00 sipas kohës së Evropës Qendrore). Megjithatë, për shkak të shqetësimeve për përmbytje dhe stuhi të parashikuara, FIFA propozoi që sfida të zhvillohej gjashtë orë më herët.
Ky vendim shkaktoi reagimin e trajnerit të Meksikës, Javier Aguirre, i cili u shpreh i pakënaqur pasi skuadra e tij do të kishte gjashtë orë më pak kohë për t’u përgatitur për atë që konsiderohet si ndeshja më e rëndësishme e viteve të fundit. Sipas propozimit, takimi do të niste në orën 12:00 sipas kohës lokale.
Megjithatë, të shtunën në mbrëmje, FIFA konfirmoi se ndeshja do të zhvillohet sipas orarit fillestar. Vendimi erdhi pasi Federata Angleze e Futbollit (FA) shprehu shqetësime serioze për tifozët që kishin planifikuar udhëtimin drejt Mexico City për ta ndjekur sfidën.
Si rezultat, pub-et në të gjithë Mbretërinë e Bashkuar do të qëndrojnë të hapura deri në orën 05:00 të mëngjesit, në mënyrë që tifozët të mund të ndjekin “Tre Luanët”, siç konfirmoi të premten kryeministri Keir Starmer
Edhe pse tifozët e të dyja vendeve u lehtësuan nga rikthimi i orarit fillestar, FIFA mori një tjetër vendim që ka ngjallur debat. Organizata konfirmoi se Alireza Faghani do të jetë arbitri kryesor i ndeshjes së shumëpritur mes Anglisë dhe Meksikës në stadiumin Azteca, një emërim që ka shkaktuar reagime të shumta në prag të kësaj sfide. Polemikat lidhen me faktin se Alireza Faghani ka arbitruar më parë ndeshje të rëndësishme të Meksikës, dhe një pjesë e tifozëve e konsiderojnë emërimin e tij të papërshtatshëm për një sfidë kaq delikate. Gjithashtu, në të kaluarën ai ka qenë në qendër të debateve për disa vendime në ndeshje të mëdha, gjë që ka shtuar skepticizmin.