Lidhja e ngushtë mes Karim Benzema dhe Zinedine Zidane nuk është një sekret për askënd në botën e futbollit.
Së fundmi, sulmuesi francez ka ndezur sërish entuziazmin e tifozëve, duke folur hapur për mundësinë që ish-trajneri i tij te Real Madrid të marrë drejtimin e kombëtares së Francës. I pyetur drejtpërdrejt nëse do të dëshironte ta shihte Zidane në krye të “Gjelave”, Benzema nuk i ka kursyer elozhet, duke konfirmuar mbështetjen e tij absolute.
“A jam i lumtur nëse ai bëhet trajner i ‘Gjelave’? Nuk e di nëse do të jetë vërtet ai, por nëse ndodh, po, do të isha vërtet shumë i lumtur,” është shprehur fituesi i Topit të Artë, duke nënvizuar raportin e veçantë që ka me Zizou-n. “Ai është një legjendë, për mua është vëllai i madh.”
Këto fjalë vijnë në një moment ku hijet e Zidane qëndrojnë gjithmonë e më afër stolit të kombëtares franceze. Nën drejtimin e tij te Real Madrid, Benzema përjetoi vitet më të arta të karrierës, duke kulmuar me fitimin e trofeve më të rëndësishëm individualë dhe ekiporë. Për opinionin sportiv francez, një ribashkim i mundshëm (qoftë edhe simbolik) ose thjesht kalimi i stafetës te Zidane, shihet si hapi i duhur për të rikthyer harmoninë dhe lavdinë absolute te “Les Bleus”.