Komiteti Olimpik i Maqedonisë, në ambientet e Qendrës Sportive dhe Rekreative “Jane Sandanski”, prezantoi delegacionin që do ta përfaqësojë Maqedoninë në Lojërat Mesdhetare “Taranto 2026”. Delegacioni i Maqedonisë do të përbëhet nga 130 anëtarë, prej të cilëve 88 sportistë, të cilët do të garojnë në 19 nga gjithsej 33 sporte. Ky është delegacioni më i madh që Maqedonia ka dërguar deri më tani në Lojërat Mesdhetare. Deri tani, sportistët maqedonas kanë fituar gjithsej 14 medalje në Lojërat Mesdhetare.
“Komiteti Olimpik bëri gjithçka që ishte e mundur për ta mbështetur logjistikisht përfaqësuesen tonë. Kjo përfshin biletat e plota të avionit me fluturim direkt, të gjithë logjistikën për udhëtimin dhe akomodimin, si dhe pajisjet e shkëlqyera që keni mundësinë t’i shihni sot. Këtë herë shkojmë shumë të përgatitur, pasi për herë të parë kemi angazhuar edhe një psikolog profesionist, i cili do të punojë me sportistët para Lojërave Mesdhetare dhe do të jetë me ne gjatë gjithë paraqitjes së tyre”, theksoi Daniel Dimevski – Drejtor i Komitetit Olimpik të Maqedonisë.
“Për mua personalisht këto janë Lojërat e treta Mesdhetare. Deri tani kam fituar një medalje të argjendtë dhe një të bronztë, kështu që tani më mbetet ari dhe këtë herë shkojmë për të. Unë besoj te të gjithë sportistët tanë, sepse më parë kemi dëshmuar veten. Kemi medalje nga Kampionatet Evropiane, Botërore dhe nga Lojërat Mesdhetare dhe gjithmonë jemi kthyer me medalje”, u shpreh Dejan Gjorgjievski – taekvondoist.