Presidenti i SHBA-ve, Donald Trump po përshkallëzon luftën tregtare me Kanadanë, duke njoftuar se do të rrisë tarifat doganore për makinat, kamionët dhe çelikun kanadez në 50 përqind.
Në një postim në Truth Social, presidenti amerikan njoftoi se tarifat e rritura do të hyjnë në fuqi më 1 janar 2027.
“Kanadaja ka përfituar në kurriz të Shteteve të Bashkuara të Amerikës prej vitesh. Tarifat e tyre doganore jashtëzakonisht të larta ndaj fermerëve tanë dhe produkteve bujqësore kanë bërë që jeta të bëhet e pamundur për këta patriotë të mëdhenj amerikanë, dhe për një kohë të gjatë kanë krijuar një deficit prej 60 miliardë dollarësh midis dy vendeve tona. Kjo nuk është e qëndrueshme dhe NUK DO TË VAZHDOJË MË KËSHTU! Duke filluar nga 1 janari 2027, tarifat doganore për të gjitha makinat, kamionët, të mëdhenj dhe të vegjël, pjesët e automjeteve dhe çelikun do të rriten në 50%. Nëse prodhohen në SHBA, do të ketë ZERO TARIFA.
Kanadaja nuk do të trajtohet më si një shtet i Shteteve të Bashkuara! Sa i përket tregtisë, por edhe në aspekte të tjera, Kanadaja është ndër vendet më të këqija në botë për të bërë biznes dhe për të pasur marrëdhënie tregtare. Ata sillen sikur u takon gjithçka, e megjithatë, NE NUK KEMI NEVOJË PËR KANADANË — ATA KANË NEVOJË PËR NE! Ata kryejnë 95% të tregtisë së tyre me SHBA-në, ndërsa me ne është pikërisht e kundërta!”, ka shkruar Trump.