Këngëtari amerikan i popit, Lionel Richie (77), përfundoi në spital pak pas koncertit në St. Louis të shtunën. Sipas mediave lokale, ai është shtruar në repartin e kujdesit intensiv.
Muzikanti i njohur është në mes të turneut „Sing a Song All Night Long“ („Këndo një këngë gjithë natën“), së bashku me grupin „Earth, Wind & Fire“, ndërsa koncerti i radhës është planifikuar për 26 shtator në San Francisko. Zëdhënësi i tij ende nuk ka dhënë ndonjë koment për mediat.
Sipas portalit „TMZ“, Richie kërkoi që në skenë të sillej një karrige drejt fundit të koncertit në St. Louis. Ai e interpretoi këngën e fundit të mbrëmjes, „All Night Long“, ulur.
Ky nuk është problemi i parë shëndetësor që Richie ka pasur gjatë turneut të tij aktual në SHBA. Edhe në koncertin në St. Paul, Minesota, më 24 qershor, ai u detyrua ta ndërpresë për pak kohë performancën pasi nuk u ndje mirë.
„Kur të merret mendja, ulesh në prapanicë“, kishte thënë ai atëherë.
Duke i treguar publikut se i merrej mendja, Richie bëri shaka se nuk e kishte interpretuar kurrë më parë këngën „Dancing on the Ceiling“ ulur, raportoi „Minnesota Star Tribune“.