Lautaro Martínez, kapiteni i Interit, ka rrëfyer për kanalin zyrtar të Federatës Argjentinase të Futbollit emocionet e Botërorit, humbjen në finale kundër Spanjës dhe rëndësinë e Leo Messit për kombëtaren.
“Pashë lojtarë si Otamendi, Romero dhe Lisandro Martínez që u detyruan të largoheshin nga fusha pasi kishin dhënë gjithçka. E njëjta gjë vlen për Messin, Álvarezin dhe të gjithë të tjerët. Disa mezi ecnin, por vazhdonin të vraponin. Luftuam deri në aksionin e fundit”, – tregoi Lautaro.
Ai pranoi se humbja ishte veçanërisht e dhimbshme: “Kemi dhënë maksimumin, thjesht nuk shkoi siç shpresonim. Kundërshtarët ishin më të mirë dhe herët a vonë kjo do të ndodhte. Humbja në finale lë një plagë të thellë”.
Sulmuesi kujtoi edhe gjysmëfinalen kundër Anglisë, ku hyri në lojë dhe shënoi në minutën e 92-të, duke siguruar kualifikimin e Argjentinës: “Na mori shumë energji. E dinim se nuk ishte një ndeshje si të tjerat, për shkak të historisë mes dy vendeve dhe çështjes së Malvinave. Megjithatë, u përqendruam tek objektivi për të arritur sërish në finale”.
Më pas, Lautaro zbuloi një histori prekëse nga kthimi në Itali: “Në aeroport, një e moshuar argjentinase më tregoi se, për herë të parë pas shumë kohësh, kishte festuar sërish një gol të kombëtares. Të dëgjosh një falënderim për domethënien që kishte ai gol ishte një ndjesi e jashtëzakonshme. Në atë moment kuptova vërtet rëndësinë e tij. Njeriu jeton për momente të tilla dhe mua më është dhënë mundësia të shënoj një nga golat më të rëndësishëm për kombëtaren”.
Lautaro vlerësoi gjithashtu ndikimin e Messit: “Leo na mësoi të mos dorëzohemi kurrë, të synojmë gjithmonë më lart dhe të kuptojmë çfarë do të thotë të veshësh këtë fanellë. E mbështetëm njëri-tjetrin dhe i uruam më të mirën çdo lojtari që zbriste në fushë”.
Pavarësisht humbjes, ai theksoi se Argjentina është gati të vazhdojë të konkurrojë në nivelet më të larta: “Gjëja më e rëndësishme është të ngrihesh përsëri dhe të dëshirosh të rikthehesh në garë. Duam ta çojmë Argjentinën sa më lart”.
Në fund, sulmuesi foli edhe për formimin e tij: “Gjithmonë them se kam lindur në dhomat e zhveshjes, sepse babai im ishte futbollist dhe kapiten i skuadrave ku luante. Ai ma transmetoi dashurinë për futbollin. Përvojat e fëmijërisë më ndihmuan të zhvilloja përgjegjësinë, disiplinën dhe përkushtimin ndaj punës. Këto janë vlerat që përpiqem t’ua përcjell edhe fëmijëve të mi”.
The post Lautaro emocionon: Pas finales së Botërorit, kur po kthehesha në Itali, një e moshuar më tha këto fjalë appeared first on Telesport.