Hakan Calhanoglu, Carlos Augusto dhe Marcus Thuram janë tre lojtarët kontratat e të cilëve Inter synon t’i rinovojë, me të dyja palët që shfaqin një gatishmëri të qartë për ta bërë këtë. Kjo përfshin edhe organizatorin turk, përkushtimi i të cilit u vu gabimisht në dyshim javët e fundit.
Calhanoglu ndihmoi në sqarimin e situatës me komentin: “Të mos e komplikojmë situatën kot”, pas fitores ndaj Como. Në fakt, nuk ka vend për drama të tilla: Marotta, Baccin dhe Gordon Stipic (agjenti i lojtarit) janë takuar tashmë dhe do të vazhdojnë bisedimet në javët në vijim.
Qëllimi është finalizimi i marrëveshjes brenda fundit të vitit, duke e zgjatur kontratën e tij me dy sezone të tjera përtej datës aktuale të skadimit, qershor 2027. Edhe pse ka një dakordësi për kohëzgjatjen, kushtet e sakta financiare janë ende duke u përcaktuar; paga e re do të jetë më e ulët se shuma aktuale prej 6,5 milionë eurosh.
Mosha e tij dhe problemet e ndryshme fizike që ka hasur gjatë dy viteve të fundit e detyrojnë klubin të tregohet i kujdesshëm, por kjo nuk e zbeh besimin e tyre tek ai, pasi mbetet një element thelbësor në skemën taktike të zikaltërve.
Hapat e radhës në agjendë janë rinovimet e kontratave për Carlos Augusto dhe Marcos Thuram. Braziliani pritet të nënshkruajë një marrëveshje që e lidh atë me Inter deri në vitin 2031. Një lëvizje e klubit për të siguruar një nga asetet e tij kyçe, si për të tashmen, ashtu edhe për të ardhmen e afërt.
Ndërkohë, kanë nisur bisedimet paraprake me sulmuesin francez, me synimin për një angazhim që shkon përtej vitit 2028. Qëllimi është të krijohet një “kontratë për gjithë jetën”. Duke lënë mënjanë ekzagjerimet, plani është që me francezin të ndiqet e njëjta rrugë që u ndoq me Lautaro.
The post Inter synon rinovimin e kontratës së 3 lojtarëve të besuar, gjithçka do të mbyllet brenda dhjetorit appeared first on Telesport.