Trajneri i Barcelona, Hansi Flick, raportohet se dëshiron dy përforcime të reja për ekipin e tij në merkaton e janarit, pasi synon të forcojë mbrojtjen.
Trajneri gjerman ka folur tashmë për mundësinë e afrimit të një mbrojtësi qendror, duke deklaruar muajin e kaluar se është diçka për të cilën klubi katalanas po punon.
Sipas “Diario Sport”, Flick dëshiron gjithashtu të afrojë një mbrojtës të majtë për të zëvendësuar Alejandro Balden i cili pritet të largohet gjatë afatit kalimtar të dimrit.
Drejtori sportiv Deco, duket se e ka përjashtuar mundësinë e largimit të Baldes këtë javë. Megjithatë, fakti që mbrojtësi ka pasur pak minuta lojë për Barcelonën deri më tani në sezonin 2026-27, bën që një largim në dimër të mbetet një mundësi reale.
Raporti thekson se Flick kërkon dy mbrojtës, pasi reparti i prapavijës është goditur nga dëmtime të shumta këtë sezon. Mungesa e fundit e Andreas Christensen ka ngritur sërish dyshime mbi besueshmërinë e tij.
Megjithatë, situata financiare e Barcelonës mbetet delikate. Që klubi të afrojë lojtarë të rinj, duhet të ketë edhe largime. Shitja e Balde do të krijonte hapësirë financiare dhe do të lironte buxhetin për paga, por Barcelona mund të detyrohet të largojë edhe ndonjë lojtar tjetër.
The post Hansi Flick mesazh Deco për merkaton e janarit, kërkon dy përforcime urgjente në mbrojtje appeared first on Telesport.
