Gjashtë persona të dyshuar për kontrabandë dhe ndërhyrje estetike me fillerë dhe botoks të rremë janë dërguar në paraburgim, ndërsa për katër të tjerë është caktuar masa e arrestit shtëpiak. Për nëntë personat e tjerë të arrestuar janë caktuar masa kujdesi.
“Nga 11 propozimet e paraqitura për caktimin e masës së paraburgimit, Prokuroria, pas marrjes në pyetje të të dyshuarve, për dy persona e ndryshoi propozimin në arrest shtëpiak, prej të cilëve gjykata njërin e pranoi, ndërsa tjetrin e refuzoi dhe i caktoi masa kujdesi. Nga 9 propozimet e mbetura për paraburgim, gjykata pranoi 6 dhe refuzoi 3, duke u caktuar këtyre të fundit masën e arrestit shtëpiak. Në total, nga ky aksion në të cilin janë propozuar edhe masa kujdesi, gjykata caktoi paraburgim efektiv për 6 persona, arrest shtëpiak për 4 dhe masa kujdesi për 9 persona, njoftoi sot Gjykata Penale.
Në aksionin e realizuar në Shkup, Strumicë dhe Manastir u arrestuan disa persona të dyshuar për kontrabandë dhe ndërhyrje estetike me fillerë dhe botoks të rremë. Mes tyre ka edhe mjekë nga Spitali i Përgjithshëm i Qytetit “8 Shtatori” dhe Klinika e Dermatologjisë në Shkup.