Apple pritet të prezantojë të martën pajisjen e re për kontrollin e shtëpisë inteligjente, e cila, sipas raportimeve, do të quhet HomeView.
Detajet për produktin dhe pajisjet e tjera që mund të prezantohen në kuadër të lansimit janë publikuar nga Mark Gurman i Bloomberg, në buletinin e tij Power On.
Sipas raportimeve, HomeView do të vijë në dy versione. Modeli standard do të jetë i projektuar për t’u vendosur mbi tavolinë ose banak dhe do të ketë një bazë metalike me altoparlant të integruar. Ai pritet të ofrohet në katër ngjyra: gri hapësinore, argjendtë, starlight dhe rozë.
Apple thuhet se do të prezantojë edhe një version që montohet në mur, i cili do të jetë në dispozicion në ngjyrat gri hapësinore dhe argjendtë.
Të dy modelet pritet të pajisen me çipin A18, të njëjtin procesor që përdoret në iPhone 16, iPhone 16 Plus dhe iPhone 16e. Sipas informacioneve të publikuara më herët, pajisja do të ketë ekran me prekje prej gjashtë inçësh.
HomeView pritet të mbështesë një numër të kufizuar aplikacionesh të Apple, por nuk do të ketë App Store për shkarkimin e aplikacioneve shtesë. Sipas raportimeve, shitja e pajisjes mund të nisë në mesin e nëntorit.
Apple pritet të përditësojë edhe HomePod mini dhe Apple TV
Përveç HomeView, kompania pritet të prezantojë një version të ri të altoparlantit inteligjent HomePod mini, i cili thuhet se do të përdorë çipin S10. Ky procesor gjendet edhe në disa modele të Apple Watch, përfshirë Series 10 dhe Series 11.
HomePod mini i ri pritet të ofrohet në pesë ngjyra: rozë, të bardhë, të gjelbër, blu dhe midnight.
Në mesin e produkteve të reja përmendet edhe një version i përditësuar i Apple TV, pajisjes që përdoret për transmetimin e përmbajtjeve. Sipas raportimeve, modeli i ri do të pajiset me çipin A19.
Një tjetër risi mund të jetë telekomanda, e cila pritet të ketë altoparlant të integruar. Kjo veçori do t’u mundësonte përdoruesve ta gjenin më lehtë telekomandën kur humbet në shtëpi.
Sipas informacioneve të publikuara, HomePod mini i ri dhe Apple TV i përditësuar mund të dalin në shitje më 30 tetor, ndërsa HomeView pritet të jetë në dispozicion në mesin e nëntorit.
Apple ende nuk i ka konfirmuar zyrtarisht këto produkte, specifikime dhe data të lansimit. Detajet përfundimtare pritet të bëhen të ditura gjatë prezantimit.