Nënkryetari i BDI-së, Arjanit Hoxha, ka reaguar ndaj sondazheve të publikuara së fundmi për rejtingun e partive politike, duke vënë në dyshim besueshmërinë e tyre dhe duke sfiduar drejtpërdrejt koalicionin VLEN.
Përmes një reagimi publik, Hoxha thekson se nuk dëshiron t’ua prishë entuziazmin nga rezultatet e sondazheve, por ka një kërkesë konkrete për ta: të shkohet në zgjedhje të parakohshme parlamentare.
“Pa dashur t’ua prishim entuziazmin nga sondazhet e publikuara sot për rejtingun e partive politike, ja një kërkesë konkrete për VLEN-in: nëse vërtet jeni kaq mirë sa ju nxjerr agjencia që ka marrë tender nga qeveria juaj, atëherë hajdeni të shkojmë në zgjedhje sa më parë,” – ka deklaruar Hoxha.
Ai më tej ka ngritur dyshime për lidhjet e agjencive të sondazheve me pushtetin dhe me VMRO-DPMNE-në, duke theksuar se vlerësimi real duhet të vijë nga qytetarët.
“Në vend që t’ju vlerësojë agjencia e afërt me VMRO-DPMNE-në, le t’ju vlerësojë populli shqiptar,” – shton ai.
Në fund, Hoxha ngre një pyetje të drejtpërdrejtë politike ndaj kundërshtarëve:
“Apo mos vallë i besoni më shumë VMRO-DPMNE-së sesa shqiptarëve?”
Deklarata e tij vjen në një moment kur sondazhet për mbështetjen politike po nxisin përplasje mes subjekteve politike në kampin shqiptar.