Kryeministri Hristijan Mickoski, në emisionin Click Plus në TV21, deklaroi se nuk ka favorit mes pesë kandidatëve për shef të ri të Prokurorisë Themelore Publike për Ndjekjen e Krimit të Organizuar dhe Korrupsionit (PTHP NKOK), zgjedhja e të cilit pritet të bëhet më 28 tetor.
Mickoski sqaroi se procesi i zgjedhjes zhvillohet me votim të fshehtë, ku prokurorët votojnë për njërin nga pesë kandidatët, ndërsa fitues shpallet ai që merr më shumë vota, pa u zhvilluar raund i dytë.
„Unë absolutisht nuk përfshihem në këtë proces dhe nuk kam favorit. Ja, po e them publikisht, në emisionin tuaj nuk kam favorit“, deklaroi Mickoski për TV21.
I pyetur nëse dëshiron të shmangë reagimet që u shfaqën gjatë zgjedhjeve të mëparshme në Prokurori, kryeministri tha se, lidhur me zgjedhjen e Prokurorit Publik të Shtetit, nuk kishte pasur reagime negative.
Ai kujtoi se më herët kishte shprehur mendimin e tij për njërën nga prokuroret, por theksoi se kjo nuk do të thotë se tani ka favorit mes kandidatëve për postin drejtues në PTHP NKOK.
Mickoski theksoi se për disa nga kandidatët ka mendim pozitiv, ndërsa për të tjerët mendim negativ, por refuzoi të hynte në detaje.
Zgjedhja e shefit të ri të PTHP NKOK është caktuar për më 28 tetor, kur prokurorët, përmes votimit të fshehtë, do të vendosin se cili nga pesë kandidatët do ta marrë këtë detyrë.