Sistemi i ri “Safe City”, i cili përfshin kamerat radar për evidentimin e shoferëve që tejkalojnë shpejtësinë, do të vihet në funksion testues duke filluar nga nesër. Fillimisht, ky sistem do të operojë në Qytetin e Shkupit, si dhe në komunat e Tetovës dhe Kumanovës, njofton Monitor.mk.
Ministri i Brendshëm, Pançe Toshkovski, ka bërë të ditur se faza testuese do të zgjasë rreth një muaj, gjatë së cilës qytetarët dhe shoferët do të marrin vetëm paralajmërime për shkeljet e evidentuara, pa gjoba. Zbatimi i plotë i sistemit pritet të nisë më 1 janar 2026, pasi të përfundojnë ndryshimet ligjore të nevojshme.
Pas aktivizimit të plotë, çdo pronar automjeti që kapet në shkelje do të njoftohet përmes SMS-i dhe emailit, duke marrë një link ku mund të shkarkojë raportin dhe urdhrin për pagesë. Brenda tetë ditëve nga marrja e njoftimit, do të ketë mundësi të paguajë gjysmën e gjobës. Pas këtij afati, shuma e plotë duhet të paguhet brenda tetë ditëve të tjera, përpara fillimit të procedurave të detyrueshme të mbledhjes.
Pagesat do të mund të kryhen elektronikisht, ndërsa sistemi do të informojë automatikisht Ministrinë e Brendshme sapo gjoba të jetë shlyer.