Në gjysmën e parë të vitit 2025, një balerinë vizatimore e krijuar nga inteligjenca artificiale, e njohur si Balerina Cappuccina, grumbulloi mbi 55 milionë shikime në TikTok dhe 4 milionë pëlqime, kryesisht nga adoleshentë. Dhe të gjithë e shohin me një filxhan çaji kapuçino mbi kokë.
Fytyra e saj vajzërore shoqërohet me një zë mashkullor të thellë, gjithashtu të gjeneruar nga kompjuteri, që këndon në italisht – ose, të paktën, pak italisht. Pjesa tjetër është krejtësisht absurde.
Balerina Cappuccina është një nga personazhet më të njohura të fenomenit të quajtur “Italian Brain Rot”, një seri memesh që shpërthyen në popullaritet këtë vit, të përbëra nga hibride kafshë-objektesh të gjeneruara nga inteligjenca artificiale, me një narrativë absurde, pseudo-italiane, shkruan AP. Ky trend ka hutuar prindërit dhe ka tërhequr brezin e ri të adoleshentëve, të cilët e shohin si një shenjues të ri kulturor.
Mbretëria absurde e inteligjencës artificiale
Personazhi i parë italian i fenomenit ishte Tralalero Tralala, një peshkaqen me atlete blu Nike në pendët e tij të zgjatura. Videot e hershme të Tralalero Tralala përmbanin këngë italiane me fjalë të pakuptimta, të cilat tingëllonin si rima të çuditshme për fëmijë.
Shpejt dolën personazhe të tjera:
- Bombardiro Crocodilo, një aeroplan ushtarak me kokë krokodili
- Lirilì Larilà, një elefant me trup kaktusi dhe pantofla
- Armadillo Crocodillo, një armadil brenda një kokosi
Krijues nga e gjithë bota kanë ndërtuar histori të tëra të treguara përmes këngëve qesharake. Video të tilla kanë qenë kaq të njohura sa kanë lançuar fraza që janë bërë pjesë e kulturës pop të Gjeneratës Alfa (të lindurit midis viteve 2010 dhe 2025).
Fabian Mosele, 26 vjeç, një animator italian që jeton në Gjermani dhe punon profesionalisht me inteligjencën artificiale, u quajt “njohës i kalbjes së trurit italiane”. Ai krijoi përmbajtjen e tij të parë në mars të këtij viti, e cila brenda natës arriti rreth 1 milion shikime, dhe që nga atëherë ka kaluar 70 milion shikime.
Nga bota virtuale tek kultura pop
Fenomeni ka kaluar nga ekrani tek bota reale: disa kanë krijuar kopje lodrash të personazheve, të tjerë shfaqje dramatike me ta. Lojërat online, si “Steal a Brainrot” në Roblox – platforma me mbi 111 milionë përdorues mujorë – u bazuan mbi këta personazhe. Qëllimi i lojës është të “vjedhësh” personazhet nga lojtarët e tjerë, dhe personazhet më të njohur kanë vlerë më të madhe brenda lojës.
Megjithatë, disa klip të këngëve absurde kanë shkaktuar polemika, si Bombardiro Crocodilo, i cili duket se tall luftën në Gaza. Pjesa më e madhe e videove mbetet e qesharake dhe absurde.
Mosele thotë:
“Konsumatorët italianë kryesisht nuk i shqetëson lidhja mes imazheve dhe tekstit. Shumë prej tyre as nuk përkthejnë italishten e pakuptimtë në anglisht. Është qesharake sepse nuk ka kuptim.”
Termi “kalbja e trurit” bëhet viral
Termi “kalbja e trurit” (brain rot) u shpall fjala e vitit 2024 nga Oxford University Press dhe përkufizohet si mpirje intelektuale nga konsumimi i tepërt i materialeve të parëndësishme. Shumë video të popullarizuara në internet, si Subway Surfer ose Skibidi Toilet, bien në këtë kategori.
Edhe pse ekzistojnë shqetësime për ndikimin e mediave sociale tek adoleshentët, studiuesit thonë se fenomeni i “kalbjes së trurit” reflekton mënyrën se si brezi më i ri përdor kohën e lirë dhe kulturën dixhitale.
Emilie Owens, studiuese e medias për fëmijë: “Është normale që brezat e mëparshëm të shohin me dyshim atë që po konsumon brezi më i ri, siç kanë bërë edhe më parë me libra komikë, televizion dhe romane.”
