Franca synon të ndalojë Ukrainën të blejë armë amerikane me një hua prej 90 miliardë eurosh nga BE-ja.
Franca po kërkon që pjesa e fondeve të dedikuar për armë të shpenzohet vetëm brenda industrisë europiane të mbrojtjes.
Presidenti francez, Emmanuel Macron, ka argumentuar prej kohësh se mbështetja e BE-së për Ukrainën duhet të përdoret për të fuqizuar prodhuesit e armëve në kontinent dhe për të promovuar pavarësinë e mbrojtjes nga Shtetet e Bashkuara, raporton The Telegraph.
Por Gjermania dhe Holanda kanë thënë se ky qëndrim do të pengonte dorëzimin e armëve të rëndësishme për mbrojtjen e Kievit, përfshirë sistemet amerikane të mbrojtjes ajrore Patriot.
Shtetet anëtare dhe Komisioni Europian aktualisht po diskutojnë detajet e huas, e cila u miratua nga liderët e BE-së në dhjetor.
Blloku vendosi t’ia huazojë paratë drejtpërdrejt Ukrainës, pasi dështoi të arrijë një marrëveshje për përdorimin e aseteve të ngrira ruse për një të ashtuquajtur “hua riparimi”.
Një zyrtar i lartë i BE-së i ka thënë “The Telegraph” se huaja e planifikuar favorizonte dorëzimin e armëve, pasi llogaritjet sugjeronin se presidenti rus, Vladimir Putin nuk ishte gati të ndalonte luftën.
Versioni më i fundit i planit parashikon që dy të tretat e 90 miliardë eurove të shpenzohen për armatime për Kievin, ndërsa fondet e mbetura do të mbulojnë boshllëkun e buxhetit të luftës së vendit.