Ish-ambasadori britanik në Shtetet e Bashkuara, Peter Mandelson, është arrestuar nga policia e Londrës me dyshimin për abuzim me detyrën publike, në një rast që lidhet me kontaktet e tij me abuzuesin seksual dhe pedofilin e dënuar Jeffrey Epstein, raportoi LBC.
Mandelson, 72 vjeç, u shkarkua nga një nga pozicionet më me ndikim në shërbimin diplomatik britanik në shtator, pasi filluan të dilnin në pah detajet e miqësisë së tij me Epstein. Skandali ushtroi gjithashtu presion mbi kryeministrin Keir Starmer, i cili pranoi se ishte në dijeni të lidhjeve të Mandelson me Epstein kur e emëroi atë ambasador.
Policia hapi një hetim penal ndaj Mandelson në fillim të këtij muaji, pasi qeveria e Starmer publikoi komunikimet midis ish-ambasadorit dhe Epstein.
Emailet midis Mandelson dhe Epstein, të publikuara nga Departamenti i Drejtësisë i SHBA-së në fund të janarit, treguan se marrëdhënia e tyre ishte më e ngushtë nga sa dihej më parë. Thuhej se Mandelson ndau informacione me financierin ndërsa ai ishte ministër në qeverinë e Gordon Brown në vitin 2009. Mandelson kohët e fundit dha dorëheqjen nga pozicioni i tij në dhomën e sipërme të parlamentit britanik.
Javën e kaluar, vëllai i vogël i Mbretit Charles, Andrew Mountbatten-Windsor, u arrestua gjithashtu me dyshimin për abuzim me detyrën publike. Ai akuzohet se i ka dërguar dokumente konfidenciale qeveritare Epsteinit ndërsa shërbente si përfaqësues tregtar i Britanisë.
The post Ish-ambasadori britanik në SHBA, Peter Mandelson, arrestohet për lidhje me Epsteinin appeared first on Alsat.