Kreu i komunës së Tetovës, Bilall Kasami ka ndarë pamje nga takimi që kanë pasur liderët e VLEN-it dhe kryeparlamentari Afrim Gashi, me kryeministrin në detyrë të Kosovës, Albin Kurti. Kasami ka shkruar se me Kurtin do të shënojnë Ditën e Alfabetit në Manastir, ndërkaq, mes tjerash thekson se i kanë uruar fitore Vetëvendosjes në zgjedhjet e 28 dhjetorit në Kosovë.
Shkrimi i Kasamit:
Drejt Manastirit me kryeministrin Kurti, shënojmë bashkë Ditën e Alfabetit
Si udhëheqësi e VLEN-it, kishim nderin ta mirëpresim sot në Shkup kryeministrin e Kosovës, mikun tim Albin Kurti.
Në një drekë pune diskutuam gjerë e gjatë për aktualitetin politik në vendet tona, thellimin e bashkëpunimit ndërshtetëror, por edhe ndërpartiak, me Lëvizjen VETËVENDOSJE si një prej shtyllave të koalicionit VLEN.
Përgëzuam njëri-tjetrin për fitoret respektive në zgjedhjet lokale dhe i uruam fitore VV-së në zgjedhjet parlamentare të 28 dhjetorit.
Bashkë me kryeministrin nisemi drejt Manastirit, aty ku 117 vjet më parë u mblodhën rilindasit tanë për ta unifikuar ABC-në shqipe, që ta shënojmë Ditën e Alfabetit siç na ka hije.
VLEN është i vendosur për ruajtjen dhe institucionalizimin e gjuhës shqipe, si dhe mbrojtjen dhe kultuvimin e trashëgimisë sonë kulturore.
Urime gjithë shqiptarëve Ditën e Alfabetit!