Gazetar: Mihajllo Donev
Këshilli i Prokurorëve Publik sot nuk arriti të zgjedhë pasardhësin e Lupço Kocevskit si ushtrues detyre prokuror publik shtetëror, kështu që seanca është caktuar për nesër.
“Seanca është caktuar më 18.12.2025 në orën 11 me një pikë në rendin e ditës – miratimi i vendimit për emërimin e një ushtrues detyre prokurori publik deri në emërimin e një Prokurori Publik të Prokurorisë Publike të Maqedonisë së Veriut, në pajtim me nenin 25, paragrafi 3 të Ligjit për Prokurorinë Publike”, thonë nga Këshilli i Prokurorëve Publik.
Megjithëse pritjet ishin që sot të zgjidhej një zëvendësim i përkohshëm për Kocevskin, siç mësoi Alsat nga burime në këshill, anëtarët kishin mendime të ndara për dy emra – Prokurorin e Lartë Publik Zllatko Bikovski dhe Prokuroren Publike Anita Isajlovska Topallova. Ishte pikërisht mungesa e shumicës për të mbështetur njërin prej këtyre dy kandidatëve, siç mëson Alsat, arsyeja kryesore që kryetari Bashkim Besimi të mbyllte seancën e sotme dhe të caktonte një të re për nesër.
Pasi të zgjidhet një prokuror i përkohshëm, Këshilli i Prokurorëve Publikë do të duhet të publikojë shpallje për zgjedhjen e një prokurori të ri publik të shtetit dhe kandidatët nga radhët e prokurorëve dhe gjyqtarët penalë me të paktën 10 vjet përvojë pune do të kenë 15 ditë kohë për të aplikuar.
Këshilli i Prokurorëve Publikë më pas do të përgatisë një mendim për secilin nga kandidatët e paraqitur dhe do ta dorëzojë atë në Qeveri, nga e cila, pas një analize, do të zgjidhet një kandidat për t’u propozuar në Kuvend.
Prokurori i ri publik i shtetit zgjidhet me shumicë të thjeshtë, pra me 61 vota. Lupço Kocevski dha dorëheqjen dje, pasi qeveria kishte dorëzuar propozim për shkarkimin e tij tek deputetët. / Alsat.mk
The post Këshilli i Prokurorëve Publik nuk zhvilloi seancë, u.d. prokurori publik do të zgjidhet nesër, Alsat mëson emrat appeared first on Alsat.