Ka shumë arsye për të ndjekur një model të caktuar të të ngrënit. Në krye të këtyre gjejmë dy përgjigjet më të njohura, të cilat nuk janë gjë tjetër veçse humbja e peshës dhe mbrojtja e shëndetit tuaj nga sëmundjet kronike. Sigurisht, qëllimet ushqyese të mësipërme lidhen drejtpërdrejt me njëra-tjetrën, pasi mbajtja e një peshe të shëndetshme është zakonisht çelësi për të shmangur disa probleme shëndetësore.
Por përveç trupit tuaj dhe gjendjes së tij të mirë, është e rëndësishme të kujdeseni për shëndetin tuaj mendor përmes zgjedhjeve tuaja dietike, duke mbrojtur dhe forcuar trurin tuaj. Dieta MIND është një mënyrë të ushqyeri që synon të ngadalësojë rënien njohëse, një problem zakonisht i lehtë, por edhe më serioz me të menduarit dhe kujtesën.
Çfarë është dieta MIND dhe si lidhet ajo me dietën mesdhetare?
Akronimi MIND përfshin dy modele kryesore dietike që nxisin fuqimisht konsumin e ushqimeve që kanë treguar se nxisin shëndetin njohës. Këto janë dieta mesdhetare dhe dieta DASH (Dietary Approaches to Stop Hypertension), e cila synon si uljen e peshës ashtu edhe uljen kryesisht të presionit të gjakut.
Në një studim të vitit 2015, epidemiologia e të ushqyerit Martha Claire Morris dhe ekipi i saj në Qendrën Mjekësore të Universitetit Rush në Çikago shqyrtuan lidhjen midis ushqimit dhe rënies njohëse dhe huazuan koncepte nga dieta mesdhetare dhe dieta DASH – dy dieta me bazë vegjetariane – për të zhvilluar një plan vaktesh të shëndetshëm për trurin që më vonë e quajtën MIND.
Si funksionon kjo dietë?
Dieta MIND përqendrohet në ngrënien e ushqimeve me bazë bimore dhe kufizimin e produkteve shtazore dhe ushqimeve të pasura me yndyrna të ngopura. I kushtohet shumë rëndësi ngrënies së manave dhe perimeve me gjethe jeshile.
Konsumimi i ushqimeve të pasura me flavonoide mund të ketë përfitime të konsiderueshme për mendjen. Boronicat, manaferrat dhe luleshtrydhet duket se vonojnë plakjen njohëse tek gratë deri në 2.5 vjet, sipas një studimi të vitit 2012.
Prandaj, duket se ekziston një lidhje midis ngrënies së perimeve me gjethe jeshile – të tilla si lakra jeshile, spinaqi dhe lakrat e brukselit – dhe rënies më të ngadaltë njohëse të shoqëruar me plakjen, sipas një studimi të vitit 2018, dhe manaferrat dhe perimet me gjethe jeshile janë të pasura me antioksidantë dhe mund të ndihmojnë në uljen e inflamacionit dhe stresit oksidativ.
Çfarë përfshin plani i dietës MIND?
Ushqime të tilla si:
-Spinaq, lakër jeshile, sallatë jeshile,
lakër brukseli -Bajame, kikirikë, arra indiane
-Luleshtrydhe, boronica, mjedra, manaferra
-Fasule
-Kinoa, tërshërë, oriz i kaftë, makarona dhe bukë integrale
-Salmon, ton, troftë
-Pulë
Dita 1
Mëngjesi: Smoothie me luleshtrydhe dhe banane
Dreka: Sanduiç me pulë të pjekur në skarë në bukë integrale me selino dhe humus
Darka: Quinoa me spec djegës dhe një hamburger me mish gjeldeti
Dita 2
Mëngjesi: Fritata me spinaq dhe domate qershi
Dreka: Sallatë me lakër jeshile, qiqra të ziera ose të pjekura, spinaq, karrota, speca, kërpudha, domate dhe salcë me vaj ulliri.
Darka: makarona integrale me pulë, brokoli të pjekur dhe sallatë jeshile
Dita 3
Mëngjesi: Bollgur me qumësht bajamesh, boronica dhe bajame
Dreka: Salmon i pjekur në skarë me spinaq të skuqur dhe ⅓ filxhan oriz të kaftë
Darka: Sallatë me spinaq, luleshtrydhe, qiqra, bajame të grira, salcë me vaj ulliri dhe një bukë të vogël gruri
The post Kjo dietë mbron trurin nga sëmundja e Alzheimerit appeared first on Alsat.