Pas konkursit të mëparshëm të pasuksesshëm, procedura për përzgjedhjen e drejtorit të Agjencia për Komunikime Elektronike (AKE) rikthehet sërish në fokus. Ky është tentimi i dytë për të zgjedhur drejtuesin e institucionit që ka rol strategjik në rregullimin e sektorit të komunikimeve elektronike, mbikëqyrjen e operatorëve dhe sigurimin e kushteve të drejta në treg.
Sipas informacioneve të TV21, në konkursin aktual janë paraqitur nëntë kandidatë, ndërsa nesër Komisioni për përzgjedhje pritet të marrë një nga vendimet më të rëndësishme në këtë procedurë – të bëjë një seleksionim të kujdesshëm dhe një vlerësim të thelluar për të përcaktuar se cilët kandidatë i plotësojnë kushtet dhe cilët duhet të vazhdojnë në fazën e ardhshme.
Komisioni për përzgjedhje përbëhet nga: Orce Simov, Ankica Trpovska, Angjelka Dinevska, Naser Ademi dhe Admirim Aliti. Pikërisht këta anëtarë kanë për detyrë të realizojnë një verifikim të saktë të dokumentacionit të dorëzuar dhe të kualifikimeve profesionale të kandidatëve, me qëllim që procesi të jetë transparent, kredibil dhe plotësisht në përputhje me kriteret ligjore.
Opinioni pret që këtë herë procedura të zhvillohet me nivel më të lartë përgjegjësie dhe kujdesi, veçanërisht duke pasur parasysh se konkursi i kaluar nuk solli rezultat dhe u anulua. Prandaj, vlerësimi i kujdesshëm i kandidatëve dhe kriteret e qarta për përzgjedhje janë thelbësore për të shmangur polemika të reja dhe për të siguruar zgjedhjen e një udhëheqjeje profesionale dhe me integritet në AKE.
Të martën pritet që Komisioni të përcaktojë se cilët kandidatë i plotësojnë kushtet për të vazhduar në intervistë, pas së cilës do të pasojë faza përfundimtare ku duhet të merret vendimi përfundimtar për emërimin.