Fillimi i Ramazanit në New York këtë vit u shënua me mesazhe të forta për bashkësinë dhe për rinovimin shpirtëror. Kryetari i qytetit, Zohran Mamdani, uroi myslimanët dhe shprehu gëzim për faktin që u takua me ta, gjatë këtij muaji të veçantë.
Kur u pyet si ndihej në ditën e parë të agjërimit, Mamdani u përgjigj me shaka. “Aktualisht ndihem mjaft i etur”, duke shtuar se Ramazani është muaji i tij i preferuar gjatë gjithë vitit.
Kryetari i New Yorkut theksoi se shpesh ky muaj shihet thjesht si periudhë kur njerëzit nuk hanë dhe nuk pijnë nga mëngjesi deri në mbrëmje, por sipas tij, kjo është vetëm një pjesë e historisë. Ai shtoi se Ramazani është gjithashtu një kohë për reflektim personal, për të ndihmuar të tjerët dhe për të përmirësuar vetveten shpirtërisht.
Mamdani tha se mezi pret të marrë pjesë në iftare dhe të bashkëpunojë me myslimanët në projekte vullnetare që lidhen me parimet e Ramazanit. “Jam i lumtur që shoh myslimanë, qoftë duke u zgjuar herët për syfyr para se të shkojnë në punë, ose duke punuar gjatë natës dhe duke bërë një ndalesë të shkurtër për të thyer agjërimin me hurma. Më gëzon që takohem me ta dhe ndaj këto momente me komunitetin”, u shpreh ai.
Sipas Institutit për Politikë Sociale, më shumë se 20 për qind e myslimanëve në Shtetet e Bashkuara jetojnë në New York, gjë që e bën qytetin një vend shumë të rëndësishëm për komunitetin mysliman. Kryetari i Bashkisë Mamdani nënvizoi se këto takime dhe aktivitetet i japin atij mundësinë të kuptojë më mirë nevojat dhe jetën e përditshme të bashkëqytetarëve të tij myslimanë.
Në këtë Ramazan, qyteti i New Yorkut po feston jo vetëm agjërimin, por edhe frymën e bashkëpunimit dhe të solidaritetit midis të gjitha komuniteteve. Mamdani tha se shpreson që këtë muaj të gjithë të gjejnë paqe, reflektim dhe mundësi për të dhënë kontribut pozitiv në shoqëri.