Kryetari i LSDM-së, Venko Filipçe, paralajmëroi për rreziqet që ndërtimi i qendrave të të dhënave mund të sjellë për furnizimin me ujë, bujqësinë dhe çmimin e energjisë elektrike. Ai tha se qendrat do të konsumojnë sasi të mëdha uji dhe energjie, duke ngritur shqetësimin nëse fermerët mund të përballen me mungesë uji dhe nëse do të nevojitet import shtesë i energjisë.
“Më tej, këto qendra të të dhënave harxhojnë kapacitete të mëdha të rrymës! A do të thotë kjo se për shkak se do të përdoret më shumë rrymë, ajo do të shtrenjtohet?! Shtesë, do të varem nga import shtesë, sepse kjo qeveri është e mirënjohur për këtë, duke pasur parasysh se kapacitetet prodhuese në shtet punojnë më së keqi se kurdoherë në vend dhe shumë se asnjëherë më parë jemi të varur nga importi i rrymës nga jashtë”, tha Filipçe.
Deputeti i VMRO-DPMNE-së, Brane Petrushevski, tha se qendrat e të dhënave janë investime kapitale që mund të sjellin kapital të huaj, shërbime dhe njohuri të reja, si dhe të diversifikojnë ekonominë e Maqedonisë. Sipas tij, vendi nuk duhet ta humbasë revolucionin e ri industrial, ndërsa investimet në qendra të të dhënave mund ta pozicionojnë Maqedoninë si një hub rajonal për teknologjinë cloud, inteligjencën artificiale dhe sigurinë kibernetike.
“Dhe po, qendrat e të dhënave konsumojnë shumë energji. Pikërisht për këtë arsye duhet t’i shfrytëzojmë si katalizator për një infrastrukturë të re energjetike. PPA-të me energji të rinovueshme, sistemet e baterive për ruajtjen e energjisë dhe menaxhimi i zgjuar i konsumit mund të nxisin investime të reja në burime të rinovueshme dhe modernizimin e rrjetit elektroenergjetik”, theksoi Petrushevski.
Socialdemokratët në opozitë paralajmërojnë për ndikimin mjedisor, veçanërisht për ujin e ngrohur që përdoret për ftohjen e qendrave dhe pasojat e mundshme për lumenjtë dhe biodiversitetin nga data-qendra, gjersa VMRO-DPMNE në pushtet ripërsërit se ato thjesht duhet të planifikohen mirë dhe të jenë në përputhje me të gjitha standardet e përcaktuara.