Ministri i Jashtëm i Kinës, Wang Yi, rikonfirmoi të shtunën angazhimin e vendit të vet për paqen dhe dialogun gjatë një takimi me homologun ukrainas, Andrii Sybiha, në kuadër të Konferencës së Sigurisë në Mynih
Wang, theksoi miqësinë e gjatë dhe partneritetin strategjik mes Kinës dhe Ukrainës, të vendosur në vitin 2011. Ai vuri në dukje se, pavarësisht sfidave globale, Kina vazhdon të mbetet partnerja më e madhe tregtare e Ukrainës, duke dëshmuar potencialin e vazhdueshëm të bashkëpunimit ndërmjet dy vendeve.
Duke e cilësuar Ukrainën si një mike dhe partnere, Wang shprehu gatishmërinë e Kinës për të bashkëpunuar me Ukrainën për të kapërcyer sfidat dhe për të zhvilluar më tej marrëdhëniet dypalëshe. Ai shprehu shpresën që pala ukrainase do të vazhdojë të sigurojë mbrojtjen e institucioneve kineze dhe shtetasve kinezë në Ukrainë.
Për sa i përket krizës në Ukrainë, Wang ritheksoi qëndrimin e palëkundur të Kinës për promovimin e paqes dhe dialogut.
Nga ana e tij, Sybiha vuri në dukje marrëdhëniet e forta dypalëshe dhe miqësinë mes popullit ukrainas e popullit kinez. Ai ritheksoi përkushtimin e Ukrainës ndaj parimit të “Një Kine” dhe gatishmërinë e palës ukrainase për të forcuar shkëmbimet dhe për të thelluar partneritetin strategjik me palën kineze. Sybiha gjithashtu siguroi se Ukraina do të vazhdojë të mbrojë institucionet kineze dhe shtetas kinezë.
Kreu i diplomacisë ukrainase vlerësoi gjithashtu ndikimin global të Kinës dhe qasjen e saj të balancuar ndaj çështjeve ndërkombëtare, duke i bërë thirrje Kinës të luajë një rol kyç në arritjen e një paqeje gjithëpërfshirëse, të drejtë e të qëndrueshme në rajon.