Vendimi për reduktimin e dy paraleleve në gjuhën shqipe në SHMK Drita në Kërçovë ka nxitur reagime të shumta në opinion dhe në komunitetin arsimor.
Bëhet fjalë për një paralele në drejtimin e gjimnazit dhe një në drejtimin profesional të makinerisë. Sipas të dhënave nga Ministria e Arsimit dhe Shkencës, për vitin e ardhshëm janë akredituar 6 paralele në gjuhën shqipe, 7 në maqedonisht dhe 3 në turqisht, duke shtuar debatet për balancën gjuhësore në arsimin lokal. Reagimet theksojnë se ky vendim cenon të drejtën për arsimim në gjuhën amtare, sidomos në një qytet ku funksionon vetëm një gjimnaz në shqip.
Po ashtu, mbetet e paqartë se ku do të regjistrohen nxënësit që mbesin jashtë, ndërkohë që këtë vit pritet të përfundojnë shkollën fillore rreth 143 nxënës. Shqetësime janë ngritur edhe për ndikimin në stafin arsimor dhe mungesën e një analize të thelluar nga institucionet përgjegjëse. Njëkohësisht, paralajmërohen pasoja për arsimin profesional dhe tregun e punës, sidomos për mungesën e kuadrove të nevojshme për Termocentrali Osllome në të ardhmen.