Italia është gati të rrisë taksat për kompanitë që përfitojnë nga rritja e çmimeve të gazit të shkaktuara nga kriza e Lindjes së Mesme, tha kryeministrja Giorgia Meloni.
Në një intervistë me stacionin radiofonik RTL 102.5, Meloni përsëriti se Italia mbështet ngrirjen e skemës së tregtimit të emetimeve të karbonit (ETS) për të lehtësuar faturat e energjisë në të gjithë Bashkimin Evropian (BE).
“Do të bëjmë gjithçka që mundemi për të parandaluar spekulimet. Jam gati të reagoj, nëse është e nevojshme, edhe duke rritur taksat për kompanitë që mund të spekulojnë me çmimet përmes faturave të energjisë”, tha Meloni.
Komentet e saj erdhën vetëm disa ditë pasi Italia rriti taksën e korporatave “IRAP” (taksa mbi prodhimin rajonal – shënim i redaktorit) për kompanitë e energjisë për të ndihmuar në financimin e një pakete lehtësimi për familjet dhe bizneset. Ky veprim do të sjellë rreth 1 miliard euro në arkën e shtetit deri në vitin 2028.
Udhëheqësit e BE-së po vlerësojnë mënyrat për të kufizuar paqëndrueshmërinë në tregun e karbonit të BE-së, si pjesë e një shqyrtimi të tregut të planifikuar për më vonë këtë vit.
Meloni tha se skema e tregtimit të emetimeve duhet të rishikohet për të siguruar që kompanitë që prodhojnë energji nga burime të rinovueshme të mos dëmtohen.
Sistemi i tregtimit të emetimeve, politika më e rëndësishme e BE-së për ndryshimet klimatike, i detyron termocentralet dhe kompanitë industriale të blejnë leje për CO2 kur ndotin dhe kufizon numrin e lejeve në treg për të zvogëluar emetimet me kalimin e kohës.
“Ne gjithmonë kemi bërë thirrje që kostot e ‘ETS’ të shkëputen nga çmimet e energjisë së rinovueshme, siç është energjia hidroelektrike dhe diellore, me qëllim uljen e kostove të energjisë”, tha Meloni.
Megjithatë, Italia muajin e kaluar u kritikua gjerësisht për miratimin e një skeme të rikuperimit të kostos për prodhuesit e energjisë termoelektrike, me avokatët e energjisë së gjelbër që thanë se masa do t’u sillte dobi prodhuesve që përdorin lëndë djegëse fosile.
The post Meloni kërcënon me taksa më të larta për kompanitë që spekulojnë me çmimet e energjisë appeared first on Alsat.