Në konferencën përuruese të Organizatës Botërore të të Dhënave (WDO) të zhvilluar të hënën në Pekin, zv.kryeministri kinez Ding Xuexiang theksoi se themelimi i WDO-së është një ngjarje e madhe që përputhet me prirjen e zhvillimit të epokës inteligjente dhe thellon bashkëpunimin ndërkombëtar mbi të dhënat.
Ai tha se Kina mbështet rritjen dhe zhvillimin e WDO-së, për të luajtur një rol në kapërcimin e hendekut të të dhënave, çlirimin e vlerave të të dhënave dhe fuqizimin e ekonomisë digjitale, duke kontribuuar në përpjekjet e përbashkëta për një të ardhme më të mirë digjitale.
Ding vuri në dukje që Kina i kushton rëndësi të madhe qeverisjes së të dhënave e zhvillimit të ekonomisë digjitale, dhe ka përshpejtuar zhvillimin e sistemeve themelore, siç janë të drejtat e pronësisë së të dhënave, duke i përdorur të dhënat për të nxitur ngritjen e nivelit industrial, shtimin e mirëqenies së njerëzve dhe rritjen e efikasitetit të qeverisjes.
Ai tha gjithashtu se do të përparojë më tej ndërtimi i Kinës Digjitale, do të thellohet zhvillimi e shfrytëzimi i burimeve të të dhënave, do të përshpejtohen risitë në teknologjitë digjitale e inteligjente dhe do të zgjerohen në mënyrë aktive skenarët e aplikimit, duke i dhënë një shtysë të fortë zhvillimit të ekonomisë digjitale globale.
Ding bëri thirrje për shfrytëzimin e themelimit të WDO-së si një mundësi për të promovuar përmirësimin e qeverisjes globale të të dhënave dhe për të realizuar zhvillimin e shëndetshëm të ekonomisë digjitale, duke paraqitur tre propozime.
Së pari, shfrytëzimi i lëvizshmërisë së madhe të të dhënave dhe promovimi i qarkullimit e i përdorimit efikas të të dhënave nëpërmjet hapjes dhe bashkëpunimit, duke nxitur hartimin, integrimin dhe njohjet e ndërsjellë të standardeve e të rregulloreve përkatëse. Së dyti, shfrytëzimi i mundësive të mëdha të të dhënave për fuqizimin e sektorëve të tjerë, duke nxitur zhvillimin e përbashkët nëpërmjet ndarjes së rezultateve kërkimore. Së treti, mbrojtja e sigurisë së të dhënave nëpërmjet qeverisjes së koordinuar, duke përballuar si duhet rreziqet nga sulmet kibernetike, krimet lidhur me të dhënat etj