Ekipi i Shkëndijës i është hakmarrë Vardarit me të njëjtën masë për humbjen e pësuar në fazën vjeshtore. Në derbin e zhvilluar në qendrën stërvitore „Petar Miloshevski“, skuadra tetovare triumfoi me rezultat 0:1, duke i shkaktuar ekipit shkupjan humbjen e parë për këtë sezon. Ajo që vlen të theksohet më së shumti është fakti se Shkëndija tashmë i është afruar ndjeshëm kreut të tabelës, duke e shkrirë diferencën në vetëm një pikë. Me këtë fitore, kuqezinjtë e Tetovës vazhdojnë serinë e shkëlqyer në pjesën pranverore, duke fituar të gjitha ndeshjet e luajtura deri më tani.
Pjesa e parë
Ndeshja nisi me një matje forcash mes dy ekipeve. Loja ishte mjaft e kujdesshme, ku prioritet ishte mbrojtja e portës sesa shënimi i golit. Përplasja kryesore u zhvillua në mesin e fushës, me mbrojtje solide që nuk lejonin aksione serioze. Rastin e parë të pastër e pati Trumçi në minutën e 32-të, por goditja e tij nga afërsia u ndal nga portieri Taleski.
Pjesa e dytë
Vardari e nisi më mirë fraksionin e dytë. Pas një krosimi të Zakariçit, Matiç u gjend në një pozicion të mirë brenda zonës, por portieri Gaje reagoi me kohë.
Goli i fitores
Në minutën e 66-të, Shkëndija realizoi një kundërsulm mjeshtëror nga ana e majtë. Ibraimi asistoi bukur drejt Latifit, i cili me një goditje të parë mposhti Taleskin, duke kaluar kampionët në fuqi në epërsi.
Fundi dramatik
Në minutën e 78-të, Latifi pati mundësinë e artë për ta mbyllur ndeshjen kur doli i vetëm përballë portierit, por Taleski bëri një pritje fantastike. Katër minuta më vonë, Danev i Vardarit rrezikoi seriozisht, por Gaje me mund të madh arriti ta devijonte topin.
Në kohën shtesë, Ibraimi tentoi të shënonte vetë në vend që të pasonte, por goditja e tij u prit sërish nga Taleski. Vardari u përpoq deri në sekondat e fundit përmes ndërprerjeve, por mbrojtja e Shkëndijës u tregua e pathyeshme, duke siguruar tre pikë të arta.
The post Shkëndija hakmirret ndaj Vardarit në Shkup, Liridon Latifi bën diferencën appeared first on Alsat.