Shkup – Deklaratat për rikthimin e diasporës në vendlindje po vihen në pikëpyetje pas zhvillimeve të fundit në skenën politike. Në opinion kanë qarkulluar reagime se zëvendëskryeministri Arben Fetahu pritet të rikthehet në Belgjikë, çka ka nxitur kritika dhe debat publik.
Zëra kritikë vlerësojnë se mesazhet institucionale për kthimin e mërgimtarëve humbasin peshë kur nuk shoqërohen me veprime konkrete nga vetë përfaqësuesit e pushtetit. Sipas tyre, krijohet një kontradiktë e dukshme mes thirrjeve për rikthim dhe zgjedhjeve personale të zyrtarëve të lartë.
“Si mund të binden qytetarët që jetojnë jashtë të kthehen dhe të investojnë në vend, kur vetë drejtuesit zgjedhin të jetojnë në diasporë?”, është pyetja që po shtrohet në debatet publike.
Nga ana tjetër, njohës të çështjeve ekonomike theksojnë se përtej retorikës politike, kthimi i diasporës kërkon kushte reale: vende pune të qëndrueshme, siguri ekonomike dhe besim në institucione. Pa këto elemente, çdo thirrje për rikthim rrezikon të mbetet vetëm deklarative.
Deri më tani, nuk ka një qëndrim zyrtar që sqaron plotësisht këto pretendime, ndërsa debati mbi raportin mes fjalëve dhe veprimeve në politikë mbetet i hapur./faktiditor.info