Gazetar: Miki Trajkovski
Sonte, edicioni i 65-të jubilar i Festivalit të Verës së Ohrit do të hapet në Teatrin Antik në Ohër nën moton “Transformimi i Shqisave”, me një performancë nga pianistja amerikane me një karrierë të shkëlqyer Kler Huangçi dhe artistët e Orkestrës Filarmonike së Maqedonisë nën dirigjimin e Edvin Outvoter. Brenda 40 ditëve që do të zgjasë festivali, publiku do të jetë në gjendje të ndjekë ngjarje të shumta muzikore dhe dramatike. Pjesa muzikore e programit do të përfshijë 29 ngjarje me performanca nga më shumë se 300 artistë. Këtu janë performancat e kuartetit të harqeve të Koncertgebaut mbretëror nga Holanda, si dhe orkestrës Sinfonietta di Bologna si përfaqësues të orkestrave më prestigjioze nacionale në botë në përgjithësi. Programi përfshin edhe një shfaqje për fëmijë, si dhe dy koncerte xhazi.
“Ne kemi investuar shumë para në këtë ngjarje dhe është një nga ngjarjet tona më të mëdha në Maqedoni. Pres që bazuar në numrin e biletave të shitura dhe kërkesat që kemi këtë vit, kuptoj se kemi një program të shkëlqyer për edicionin e 65-të. Kjo do të tërheqë shumë më tepër turistë në Ohër dhe në rajon”, tha Zoran Ljutkov- Ministër i Kulturës dhe Turizmit.
Dashamirësit e teatrit do të kenë mundësinë të shohin shfaqjen që është më e vlerësuar këtë vit dhe është gjithashtu shfaqja e vitit “12”, e prodhuar nga Teatri Popullor i Maqedonisë. Do të shfaqen edhe dy premiera në prodhime nga Teatri Turk nga Shkupi dhe Teatri i Dramës nga Shkupi. Për ditën e fundit të festivalit dhe uljen e perdes, skena e Teatrit Antik është e rezervuar për shfaqjen teatrale “Elektra” me regji nga Dejan Projkovski, dhe prodhuar nga Shoqata e Teatrove nga Koreja e Jugut dhe “Vera e Ohrit”. Këtë vit, mungesa e artistëve shqiptarë është e dukshme, por kthehen artistët nga Rusia. Përveç Teatrit Antik, ngjarjet do të mbahen edhe në Kishën e Shën Sofisë, në hollin e Shën Sofisë dhe në Qendrën Kulturore. Festivali mbahet nën patronazhin e Presidentes së Maqedonisë Gordana Siljanovska-Davkova, e cila do ta hapë atë, dhe me mbështetje financiare nga Ministria e Kulturës dhe Turizmit, e cila këtë vit ndau 31 milionë denarë. Televizioni Alsat është gjithashtu një mbështetës mediatik./Alsat.mk
The post Sonte fillon edicioni i 65-të i Festivalit të Verës së Ohrit appeared first on Alsat.