Sipas studimit, praktika e puthjes daton rreth 21 milion vjet më parë, dhe provat sugjerojnë se Neandertalët gjithashtu “i shtrëngonin buzët së bashku” – jo vetëm për arsye romantike, por edhe për t’u ngrohur në kushtet e vështira të Epokës së Akullnajave.
Puthja ka qenë prej kohësh një enigmë evolucionare për shkencëtarët, pasi mbart rreziqe si transmetimi i sëmundjeve dhe asnjë avantazh të qartë riprodhues ose biologjik. Megjithatë, hulumtimet e reja sugjerojnë se kjo sjellje është shumë më e vjetër nga sa mendohej më parë.
Studiuesit e përcaktuan një puthje si “kontakt jo-agresiv gojë më gojë që nuk përfshin transferimin e ushqimit”.
Sipas Universitetit të Oksfordit, rezultatet sugjerojnë se puthja është një “tipar i lashtë” tek majmunët e mëdhenj, i zhvilluar tek paraardhësit e përbashkët të primatëve 17 deri në 21 milion vjet më parë. Sjellja ka vazhduar gjatë gjithë evolucionit dhe është e pranishme tek shumica e primatëve të mëdhenj sot.
Ekipi i hulumtimit mblodhi fillimisht të dhëna mbi primatët modernë që janë vërejtur duke u puthur, siç janë shimpanzetë dhe orangutangët. Pastaj, duke e trajtuar puthjen si një tipar evolucionar, ata e “ndërtuan” atë në pemën gjenealogjike të primatëve dhe simuluan skenarë të ndryshëm për të vlerësuar mundësinë që edhe paraardhësit e lashtë ta kenë praktikuar atë.
Hulumtimet e mëparshme kanë treguar tashmë se njerëzit dhe Neandertalët shkëmbyen mikrobe orale përmes pështymës – një tjetër tregues i fortë se ata putheshin me njëri-tjetrin.
The post Studimi i ri zbulon: Historia e puthjes është më shumë se 20 milionë vjeçare appeared first on Alsat.