Gjykata e Lartë në Novi Sad e ka ndalur procedurën penale kundër Goran Vesiqit, Jelena Tanaskoviq, Anita Dimoski dhe tre të pandehurve të tjerë në çështjen për shembjen e një pjesë të ndërtesës së Stacionit Hekurudhor në Novi Sad.
Sipas aktakuzës të Prokurorisë së Lartë Publike të datës 16 shtator të këtij viti, Vesiq, Tanaskoviq dhe Dimoski akuzoheshin për vepër të rëndë penale kundër sigurisë së përgjithshme. Po njëjtën për vepër të rëndë penale akuzoheshin edhe Milan Spremiq, Marina Gavriloviq dhe Dejan Todoroviq, por në lidhje me kryerjen e parregullt dhe të papërshtatshme të punimeve ndërtimore. Gjykata vlerësoi se nuk ka prova të mjaftueshme që do ta mbështesnin dyshimin se ata i kanë kryer veprat për të cilat akuzoheshin.
Hiqet paraburgimi për një pjesë të të pandehurve
Me këtë vendim, Jelena Tanaskoviq, Milan Spremiq, Marina Gavriloviq dhe Dejan Todoroviq u është hequr masa e ndalimit për të mos u larguar nga shtëpia dhe është urdhëruar lirimi i tyre i menjëhershëm. Nga ana tjetër, Anita Dimoski dhe Goran Vesiq mbeten në arrest shtëpiak, në bazë të një vendimi të veçantë të Gjykatës së Lartë në Beograd.
Procedura vazhdon kundër shtatë personave
Megjithatë, gjykata e konfirmoi procedurën akuzuese kundër edhe shtatë të pandehurve të tjerë: Nebojsha Shurlan, Slobodan Naumoviq, Milan Jellkiq, Liljana Miliq Markoviq, Jasna Stojiljkoviq Miliq, Zorica Slavkoviq Marjanoviq dhe Dushan Jankoviq. Për ta, gjykata konstatoi se ekzistojnë prova të mjaftueshme për dyshim të arsyeshëm se kanë kryer vepra penale të lidhura me çështjen.
Në arsyetim thuhet se provat tregojnë veprime në kundërshtim me rregulloret, lëshime në kryerjen e punimeve, në mirëmbajtjen e objektit dhe në mbikëqyrje. Gjykata vlerësoi se këto lëshime janë në lidhje shkak-pasojë me dëmin e shkaktuar dhe se në këtë fazë është përmbushur standardi i dyshimit të arsyeshëm për vazhdimin e procedurës.