Në margjinat e samitit të Bashkëpunimit Ekonomik Azi-Paqësor (APEC) ka nisur takimi trepalësh mes presidentëve të Kinës, SHBA-së dhe Rusisë, Xi Jinping, Donald Trump dhe Vladimir Putin.

Xi theksoi se të tria shtetet duhet të bashkëpunojnë për zgjidhjen e problemeve globale.

“Duhet të mësojmë nga historia. Kohët e vështira tregojnë se kush është vërtet i gatshëm të marrë përgjegjësi”, deklaroi presidenti kinez.

Ndërkaq, Putin vuri në pah përgjegjësinë e përbashkët të tri fuqive për ruajtjen dhe forcimin e së drejtës ndërkombëtare. Ai tha se ato kanë shumë interesa të përbashkëta në zgjidhjen e konflikteve rajonale, përfshirë luftën në Ukrainë.

“Rusia, SHBA-ja dhe Kina mund të japin një kontribut të rëndësishëm në forcimin e paqes dhe stabilitetit”, tha Putin.

Nga ana tjetër, Trump deklaroi se tre liderët po shkruajnë histori.

“Ne të tre kemi shumë gjëra për të diskutuar. Si presidentë të tri vendeve më të mëdha në botë, kemi përgjegjësi të veçantë për të mbajtur një dialog me respekt dhe të orientuar drejt rezultateve, për çështje që nuk ndikojnë vetëm te qytetarët tanë, por në të gjithë planetin”, u shpreh Trump.

Ai kritikoi liderët e mëparshëm botërorë për shmangien e dialogut me shtetet me të cilat nuk pajtoheshin, duke thënë se refuzimi për të diskutuar problemet nuk ka zgjidhur asnjë çështje.

Trump theksoi gjithashtu rëndësinë e çarmatimit bërthamor, duke thënë se tri fuqitë më të mëdha bërthamore kanë një pozitë të veçantë për të diskutuar uljen e numrit të armëve bërthamore në botë.

“Është shumë e vështirë të heqim dorë nga armët bërthamore”, pranoi ai.

Presidenti amerikan konfirmoi se në takim do të diskutohet edhe lufta në Ukrainë, duke shtuar se më herët gjatë ditës kishte zhvilluar një bisedë të gjatë me Putinin për këtë çështje.

Pas deklaratave hyrëse, gazetarët dhe kameramanët u larguan nga salla, ndërsa tre presidentët vazhduan bisedimet me dyer të mbyllura.