Venezuela po vendos armë, përfshirë pajisje ushtarake ruse të vjetruara, dhe po planifikon rezistencë guerile në rast të një sulmi ajror ose tokësor të SHBA-së, tregojnë dokumentet e planifikimit të para nga media britanike.
Presidenti i SHBA-së, Donald Trump, kishte ngritur më parë mundësinë e operacioneve tokësore në Venezuelë, duke thënë se “toka do të jetë e radhës” pas sulmeve ndaj anijeve që Uashingtoni thotë se përdoren për trafik droge. Megjithatë, ai më vonë mohoi se po shqyrtonte një sulm ndaj Venezuelës.
Presidenti i Venezuelës, Nicolas Maduro, ka thënë se qytetarët dhe ushtria do t’i rezistojnë çdo përpjekjeje për të përmbysur qeverinë.
Sipas dokumenteve të planifikimit dhe burimeve nga agjencitë perëndimore, qeveria po mbështetet në dy strategji – rezistenca guerile dhe krijimi i anarkisë në rrugët e Karakasit.
Mbrojtja guerile, të cilën qeveria e quan “rezistencë afatgjatë”, do të përfshinte njësi të vogla ushtarake në më shumë se 280 vende që do të kryenin sabotime dhe sulme ndaj forcave armike.
Strategjia e dytë, e quajtur “anarkizim”, do të mbështetej te shërbimet e inteligjencës dhe mbështetësit e armatosur të partisë në pushtet për të krijuar çrregullime dhe për ta bërë të vështirë kontrollin e vendit në rast të një pushtimi.
“Ata nuk do të zgjasnin as dy orë në një luftë konvencionale”, tha një burim pranë qeverisë.
“Ne nuk jemi të përgatitur të përballemi me një nga ushtritë më të fuqishme në botë”, shtoi një burim tjetër i njohur me aftësitë mbrojtëse të Venezuelës.
Ushtria venezueliane, e cila vuan nga mungesa e trajnimit, pagat e ulëta dhe defektet në pajisje, po përballet me probleme serioze.
Dy burime ushtarake pohojnë se disa komandantë janë detyruar të negociojnë me prodhuesit vendas të ushqimit për të ushqyer ushtarët e tyre.
Ushtarët e zakonshëm fitojnë rreth 100 dollarë në muaj, ndërsa një shportë ushqimore bazë kushton rreth 500 dollarë.
Maduro ka thënë se tetë milionë civilë po i nënshtrohen stërvitjes ushtarake për të mbrojtur vendin, por burimet vlerësojnë se jo më shumë se 7,000 njerëz – përfshirë oficerë të inteligjencës dhe mbështetës të partisë në pushtet – do të merrnin pjesë në një konflikt të vërtetë.
Venezuela mbështetet shumë në donacionet e pajisjeve ushtarake ruse për dekada të tëra.
Ministria e Jashtme ruse tha javën e kaluar se ishte gati të ndihmonte Venezuelën dhe bëri thirrje për një ulje të tensioneve.
Maduro ka kërkuar riparimin e avionëve Sukhoi, përmirësimin e sistemeve të radarëve dhe dorëzimin e sistemeve të raketave, ndërsa sipas burimeve, 5,000 raketa Igla janë vendosur tashmë.
Dokumentet që datojnë midis viteve 2012 dhe 2022 tregojnë një fokus afatgjatë në mbrojtje kundër “agresionit imperialist”.
Opozita e Venezuelës, OJQ-të dhe qeveritë perëndimore akuzojnë regjimin e Maduros për lidhje me trafikun e drogës, veçanërisht në provincat perëndimore, ku veprojnë grupet guerile kolumbiane dhe ku kultivohet koka. Qeveria i mohon këto akuza.
The post Venezuela përgatitet për rezistencë guerile në rast të një sulmi të mundshëm amerikan appeared first on Alsat.