Agjencia Kineze e Hapësirës me Ekuipazh (CMSA) zbuloi të martën logon për misionin e ngarkesave Tianzhou 10, një nga tre misionet fluturuese drejt stacionit hapësinor kinez Tiangong që janë planifikuar për vitin 2026.
Logo ka një dizajn me sfond ngjyrë blu kozmike. Anija kozmike e ngarkesave Tianzhou në qendër, përshkon një trajektore të artë drejt stacionit hapësinor Tiangong, me numrin 10 të stilizuar, të integruar me emblemën e CMSA-së pranë qendrës vizuale.
Forma rrethore e logos simbolizon dëshirat për suksesin e misionit dhe harmoninë midis hapësirës dhe Tokës, me ngjyrën e shkallëzuar nga e artë në të kuqe, që thekson guximin e palëkundur të profesionistëve kinezë të hapësirës, shpjegoi CMSA.
Nisja do të shënojë misionin e 10-të të anijes kozmike pa ekuipazh të klasës Tianzhou dhe misionin e 9-të të furnizimit për stacionin hapësinor Tiangong. Tianzhou-9, misioni i fundit i furnizimit, u nis më 15 korrik 2025.
Sipas CMSA-së, anija kozmike e ngarkesave Tianzhou-10 do të niset nga Vendi i Lëshimeve Hapësinore Wenchang në vitin 2026. Anija do të lidhet në portin e pasmë të modulit bërthamë të stacionit hapësinor.
Tianzhou-10 do të dorëzojë furnizime për ekuipazhin, pjesë këmbimi për mirëmbajtje, lëndë djegëse dhe kostume të reja për aktivitete jashtë anijes (EVA), raportoi Xinhua. Ngarkesa e tij përfshin gjithashtu mostra eksperimentesh për projekte shkencore të aplikuara. Kur anija të dalë nga orbita, ajo do të digjet në atmosferë dhe do të asgjësojë mbeturinat e mbledhura nga stacioni hapësinor.
Kina ka planifikuar gjithashtu dy misione me ekuipazh në stacionin hapësinor Tiangong në vitin 2026, sipas CMSA-së.
Ekuipazhe nga Rajonet Administrative Speciale të Hong-Kongut dhe Makaos, pritet të marrin pjesë në misionet fluturuese të stacionit hapësinor që nga ky vit. Një anëtar i ekuipazhit nga misioni Shenzhou 23, do të ndërmarrë një eksperiment njëvjeçar me kohëzgjatje të zgjatur në bordin e stacionit hapësinor Tiangong.