Lideri i Bashkimit Demokratik për Integrim, Ali Ahmeti ka reaguar ndaj kryeministrit të Kosovës, Albin Kurti pas deklaratës që bëri për gjuhën shqipe në Maqedoni, përcjell TV21.
Ne takimin që BDI pati në Butel, Ahmeti tha se, gjuha shqipe në Maqedoninë e Veriut është zyrtare dhe se do ta mbrojnë këtë dhe shtoi se, pavarësisht se a është BDI-ja në pozitë ose në opozitë, nuk do të lejojnë që Marrëveshja e Ohrit të preket.
“Sonte në Butel në Mbledhjen me popullin të organizuar nga dega e BDI-së, para qindra simpatizantëve e anëtarëve të partisë lideri Ali Ahmeti porositi të gjithë faktorët politik brenda dhe jashtë shtetit se gjuha shqipe në Maqedoninë e Veriut është zyrtare dhe me tërë qenien tonë do ta mbrojmë këtë.
Marrëveshja e Ohrit është arritur me gjakun e dëshmorëve e është jetësuar me djemtë më të mirë të UÇK-së që vazhduan idealin e tyre në BDI, andaj sa të jetë gjallë BDI-ja, në opozitë apo në pozitë themelet e Marrëveshjes së Ohrit nuk tolerojmë të preken.
Ali Ahmeti siguroi se me gjithë kapacitetin e tij do të bëj çmos të ndal këtë turpërim që janë duke e toleruar të ndodhë shkelësit e legjitimitetit shqiptar në Qeveri”, thuhet në komunikatën e BDI-së.